बन्दीपुर

नेपाली विकिपीडियाबाट
यसमा जानुहोस्: परिचालन, खोज्नुहोस्
बन्दीपुरबाट देखिने पहाडी दृष्य
टुँडिखेलबाट देखिने बन्दीपुर बजार

बन्दीपुर नेपालको पश्चिमाञ्चल विकास क्षेत्र गण्डकी अञ्चलको तनहुँ जिल्लामा अवस्थित एक गाउँ विकास समिति हो। यो तनहुँ(पश्चिम नेपाल)को पुरानो सदरमुकाम सहर हो | यो शहर मोटर यातायातको सुविद्या नहुँदा २०२० सम्म पश्चिम पहाडको मुख्य व्यापारीक नाकाको रूपमा रहेको थियो | तनहुँ, कास्की, लम्जुड्ग, र गोर्खाको लागि दक्षिण बाट सामान ल्याउने र पहाडि भेक बाट सामान दक्षिण पठाउने मुख्य स्थलको रूपमा यो नाकाको विकास भएको हो|

नेवार संस्कृतिमा लिपिएको बन्दीपुरको शहरी संरचना साढे दुई सय वर्ष पुरानो मानिन्छ। रहनसहन, थिति र संरचनाका साथसाथ प्राकृतिक सौन्दर्य बन्दीपुरका विशेषता हुन्। बन्दीपुर वरिपरिका गाउँमा मगर संस्कृतिको अवलोकन गर्न पाइन्छ|हिमालयको फराकिलो दृश्य बन्दीपुरको विशेषता हो। बजारबाट दश मिनेट परको टुँडिखेलबाट हिमालको हिँउमात्र देखिँदैन, ३०० किमि फराकिलो क्षितिजमा फैलिएका फाँट, पहाड पनि देखिन्छन्।

बन्दीपुरबाट पूर्वपट्टि भक्तपुरको उत्तरमा पर्ने जुगल देखिन्छ। पश्चिमतिर चाहिँ लाङटाङ, गणेश, गोरखा (मनास्लु, हिमचुली तथा बौद्धसहित), अन्नपूर्ण, धौलागिरि र काञ्जिरोवा हिमाल फेददेखि टुप्पोसम्मै देखिन्छन्। तलतिर मर्स्याड्दी नदीले बनाएका उपत्यका हेर्दा लाग्छ, बन्दीपुर उपत्यका माथि झुण्डिइरहेको छ! बन्दीपुरले प्राकृतिक भ्यु टावरको उपमा यसै पाएको होइन|

बन्दीपुरबाट दुई घण्टा हिँडेर पातालीद्वार वा स्वर्गद्वारी गुफा पुग्न सकिन्छ। यहाँको सिद्ध गुफा नेपालकै सबैभान्दा ठूलो गुफा मानिन्छ। डा. तीर्थबहादुर श्रेष्ठ आफ्नो बन्दीपुर यात्रा सम्झदै भन्छन्, “सिद्ध गुफामा त हात्ती चढेर पनि जान सकिन्छ होला। भित्र त टेनिस नै खेल्न पुग्ने ठाउँ छ।” बन्दीपुर वरिपरिका डाँडा हाइकिङका दृष्टिले पनि उपयुक्त मानिन्छन्।बन्दीपुर प्याराग्लाइडिङका लागि पनि चर्चित छ। ११५० मिटर उचाइमा रहेको भञ्ज्याङ चौतारा, बुरुञ्चे डाँडाबाट ग्लाइडरहरू तल फाल हाल्ने गर्छन्। पोखराका कम्पनीहरूले यहाँको प्याराग्लाइडिङको व्यवस्थापन गरेका छन्। सेती नदीमा राफ्िटङ गर्न दमौली आउनेहरूले पनि बन्दीपुरमा एक दिन बास बस्ने गरेका छन्।

मुग्लिङबाट आधा घण्टा जतिमा गाडीमा पृथ्वी राजमार्गको डुम्रेबजार पुगिन्छ, त्यहाँबाट दुई किमि पश्चिममा पिप्ले, जहाँबाट आधा घण्टा मोटर यात्राबाट पुरानो पहाडी शहर बन्दीपुर पुग्न सकिन्छ|

पहाडी संस्कृति, पहाडी दृश्य र पहाडी पैदल यात्राका लागि बन्दीपुर अत्यन्त उपयुक्त गन्तव्य हो। मङ्सिरतिर जानुभयो भने हिमाल हेर्दै बन्दीपुरे सुन्तलाको स्वाद लिन पाउनुहुन्छ। मध्यजेठदेखि मध्य-असारसम्म आउने आगन्तुकको बजारमा मानिसले मात्र होइन, बाटैभरि चौबीस जातिका सुनगाभाले पनि स्वागत गर्छन्। यीमध्ये ब्याम्बो अर्किड त फागुन, चैतदेखि पुससम्मै 'इलाउँदैन। बन्दीपुरमा घुम्नको लागि बसोबासको समस्या छैन। टुँडिखेलमा सुविधासम्पन्न रिसोर्ट मात्र छैन, पुराना नेवारी घरहरूलाई पनि मध्यमस्तरको बसोबासका निम्ति उपयुक्त होटलका रूपमा विकसित गरिएको छ। यहाँका कतिपय घरहरूमा खाना र बिहानको खाजा खाने गरी सशुल्क पाहुना भएर बस्न सकिने व्यवस्था पनि छ।

सन्दर्भ सामाग्रीहरू[सम्पादन गर्ने]

यो पनि हेर्नुहोस्[सम्पादन गर्ने]




सन्दर्भ सामग्री[सम्पादन गर्ने]

बाह्य सूत्र[सम्पादन गर्ने]