लहान नगरपालिका

नेपाली विकिपीडियाबाट
यसमा जानुहोस्: परिचालन, खोज्नुहोस्
लहान नगरपालिका
—  नगरपालिका  —
लहान नगरपालिका is located in Nepal
लहान नगरपालिका
नेपालको नक्शामा लहान नगरपालिका
निर्देशांक: 26°40′N 86°48′E / 26.667, 86.8
देश  नेपाल
अञ्चल सगरमाथा अञ्चल
जिल्ला सिरहा जिल्ला
सरकार
 - प्रकार लहान नगरपालिका
 - मेयर NA
जनसङ्ख्या (२०५८)
 - जम्मा ३३,६५३
समय क्षेत्र नेपालको प्रमाणिक समय (UTC+५:४५)

महेन्द्र राजमार्गमा अवस्थित सिरहा जिल्लाको लहान नगरपालिका सुन्दर, शान्त र हराभरा छ। वि.सं. २०३२मा सरकारद्वारा लहान बजार, लहान गोठ र सिग्याही मटियर्वा गाविस मिलाएर नगरपञ्चायत स्थापना गरिएको थियो। नगरपालिकाको २०३३ देखि २०५४ सालसम्मको पाँच पटक निर्वाचन भयो। पाँच पटकको निर्वाचनमा लगातार तीनपटक लगनलाल चौधरी नगरप्रमुखमा विजयी भएका थिए। वि.सं. २०३३को निर्वाचनमा भने पहिलो प्रधानपञ्चको रूपमा रामलोचन महतो र उप-प्रधानपञ्चमा विश्वनाथ चौधरी विजयी भएका थिए। त्यसैगरी २०४९ सालको निर्वाचनमा नगरप्रमुखमा लगनलाल चौधरी र उप-प्रमुखमा प्रकाशबहादुर के.सी. विजयी भए। वि.सं. २०५४को निर्वाचनमा प्रमुखमा मुनी साह र उप-प्रमुखमा राजेन्द्र महतो विजयी भएका थिए। त्यसपछि तोकिएको समयमा निर्वाचन हुन नसक्दा श्री ५को सरकारद्वारा नगरप्रमुखमा प्रकाशबहादुर के.सी. र उप-प्रमुखमा सागरलाल चौधरीलाई मनोनित गरिएको थियो।

भौगोलिक स्थिति[सम्पादन गर्ने]

उक्त नगरपालिकाको पूर्वमा बलान नदी (सप्तरी जिल्ला), पश्चिममा पडरिया गाविस र बस्तीपुरको पूर्वी सिमाना, उत्तरमा भदैया गाविस र गोविन्दपुरको दक्षिण सिमाना र दक्षिणमा सोनमति मझौरा गाविस पर्दछन्।

नामकरण[सम्पादन गर्ने]

वर्षौ पहिले यस ठाउँमा हाट लाग्ने गर्दथ्यो। पहाडबाट व्यापारी सरसामान खरीद गर्न र बेच्न आउँथे। ती व्यापारीबीच परस्पर मारपीट भयो र मारपीटको क्रममा 'लौ हान' शब्दको बारम्बार प्रयोग भएपछि कालान्तरमा लौहानबाट अप्रभंश भई लहान नामाकरण भएको हो। पहिले उक्त क्षेत्रमा लौहान सिंह नामक राजाले राज्य गरेकाले उक्त नाम रहेको पनि बताइन्छ।

जनसंख्या र रितिथिति[सम्पादन गर्ने]

उक्त नगरमा ५ हजार २ सय ६२ घरपरिवारका २७ हजार ६ सय ५४ जना बसोबास गरिरहेका छन्। तीमध्ये पुरूष १४ हजार ५ सय ३२ र महिला संख्या १३ हजार १ सय २२ रहेको सन् २००१को जनगणनाले देखाउँछ। नगरपालिकामा अधिकांश व्यक्ति मैथिली भाषा बोल्छन्। हिन्दूहरूको बडादशैं, तिहारका साथै स्थानीय चाडपर्वमा सिरूवा, फागु, भातृ द्वितीया, चौठ चन्द्र, छठ, दीपावली प्रमुख छन्। नगरमा कोइरी, थारू, मुसलमान, मारवाडी, मुसहर, यादव, डुम, चमार, ब्राम्हण, क्षेत्रीलगायत विभिन्न जातजाति बसोबास गर्दै आइरहेका छन्। लहान बजारदेखि ४ कि.मि. पश्चिममा ऐतिहासिक धार्मिकस्थलको रूपमा राजा सहलेसको फूलवारी छ। उक्त फूलवारीमा प्रत्येक वर्ष वैशाख १ गतेका दिन मेला लाग्छ। उक्त ठाउँको एउटा रूखमा वर्षको एकचोटि वैशाख १ गते मात्र फूल फुल्छ। उक्त फूल हेर्न नेपाल र भारतका हजारौं व्यक्ति पुग्छन्। त्यसैगरी, लहानदेखि ६ कि.मि. उत्तरमा पकडरिया गढ अवस्थित छ भने नगरमा विभिन्न मठ मन्दिर छन्।

विविध[सम्पादन गर्ने]

लहानस्थित सगरमाथा चौधरी आँखा अस्पतालले मुलुक र विशेष गरी भारतमा प्राप्त गरेको ख्यातिले अन्तर्राष्ट्रिय जगत्मा लहानको पहिचान कायम भएको छ। सन् १९८२मा स्थापना भएको उक्त अस्पतालबाट हाल सम्म २० लाखभन्दा बढी व्यक्तिको आँखा उपचार गरिएको अस्पतालले जनाएको छ। यहाँ निजी क्याम्पस एउटा छ भने २५ शैय्याको एउटा सरकारी अस्पताल पनि छ।

यो पनि हेर्नुहोस्[सम्पादन गर्ने]

सन्दर्भ सामग्रीहरू[सम्पादन गर्ने]

बाहिरी कडीहरू[सम्पादन गर्ने]