आर्लेमा सुत्नेकोठा

आर्लेमा सुत्ने कोठा (पहिलो संस्करण)
कलाकार	भिन्सेन्त फन गोख
वर्ष	सन् १८८८
माध्यम	क्यानभासमा तेल चित्र
आकार	72 cm × 90 cm (28.3 in × 35.4 in)
स्थान	फन गोख सङ्ग्रहालय, आम्स्टर्डम

आर्लेमा सुत्नेकोठा (फ्रान्सेली: La Chambre à Arles; नेदरल्यान्डेली: Slaapkamer te Arles) १९औँ शताब्दीका डच उत्तर-प्रभाववादी चित्रकार भिन्सेन्त फन गोखद्वारा बनाइएका तीनवटा समान चित्रहरूको शृङ्खला हो। यस रचनाको लागि फन गोखको आफ्नै शीर्षक केवल सुत्नेकोठा (फ्रान्सेली: La Chambre à coucher) थियो। उनका पत्रहरूमा वर्णन गरिएअनुसार यसका तीनवटा प्रमाणिक संस्करणहरू छन्, जसलाई भित्ताको दाहिने तिर रहेका चित्रहरूका आधारमा सजिलैसँग एकअर्काबाट छुट्याउन सकिन्छ।

यो चित्रले फ्रान्सको बुसे-दु-रोन, आर्लेस्थित २, प्लेस लामार्टिनमा रहेको फन गोखको सुत्ने कोठालाई चित्रण गर्दछ, जसलाई पहेँलो घर भनेर चिनिन्छ। दायाँ तर्फको ढोका माथिल्लो तला र भर्‍याङतर्फ खुल्थ्यो; बायाँ तर्फको ढोका पाहुना कोठाको थियो जुन उनले गोगाँका लागि तयार पारेका थिए; अगाडिको भित्तामा रहेको झ्यालबाट प्लेस लामार्टिन र त्यसका सार्वजनिक बगैँचाहरू देखिन्थे। यो कोठा आयताकार नभई समलम्ब चतुर्भुज आकारको थियो, जसको अगाडिको भित्ताको बायाँ कुनामा अधिक कोण र दायाँमा न्यून कोण थियो।