एल्टन जोन

सर एल्टन जोन CH CBE
सन् २०२४ को लन्डन चलचित्र महोत्वमा जोन
जन्म	(1947-03-25) २५ मार्च १९४७ बेलायत
पेशा	गायक रचनाकार पियानोवादक
कार्यकाल	१९६२–हाल
सन्तान	२
वेबसाइट	eltonjohn.com

सर एल्टन हरक्युलिस जोन (जन्म नाम रेजिनाल्ड केनेथ ड्वाइट; २५ मार्च १९४७) एक बेलायती गायक, गीतकार र पियानोवादक हुन्। उनको संगीत र प्रदर्शनशैलीले संगीत उद्योगमा ठूलो र दीर्घकालीन प्रभाव पारेको छ। गीतकार बर्नी टाउपिनसँगको उनको गीत लेखन साझेदारी इतिहासकै सबैभन्दा सफलमध्ये एक मानिन्छ। जोन इतिहासका १९औं EGOT (Emmy, Grammy, Oscar, Tony) विजेता हुन्। उनले ३०० मिलियनभन्दा बढी एल्बम बिक्री गरेका छन्, जसले उनलाई सर्वकालीन सर्वाधिक बिक्री हुने संगीत कलाकारमध्ये एक बनाएको छ।

जोनले सानै उमेरमा पियानो बजाउन सिकेका थिए र रॉयल एकेडेमी अफ म्युजिकको छात्रवृत्ति प्राप्त गरेका थिए। १९६० को दशकमा उनले ब्लुजोलोजी नामक ब्लुज ब्यान्ड गठन गरे, बर्नी टाउपिनसँग मिलेर अन्य कलाकारहरूका लागि गीत लेखे, र सेसन सङ्गीतकारको रूपमा काम गरे।

जोन एचआईभी/एड्स सम्बन्धी परोपकारी कार्यमा सक्रिय छन् र सन् १९८० को दशकको अन्त्यदेखि एड्सविरुद्धको लडाइँमा संलग्न छन्। उनले १९९२ मा "एल्टन जोन एड्स फाउन्डेशन" स्थापना गरेका थिए, जसले स्थापना भएदेखि हालसम्म ३०० मिलियन पाउन्डभन्दा बढी रकम संकलन गरेको छ। जोन सन् १९७६ देखि सन् १९८७ सम्म र पुनः १९९७ देखि २००२ सम्म "वाटफोर्ड फुटबल क्लब" का अध्यक्ष र निर्देशक थिए, र हाल उनी क्लबका आजीवन मानार्थ अध्यक्ष हुन्। सन् १९७० को दशकको अन्त्यदेखि सन् १९८० को दशकको अन्त्यसम्म, जोन गम्भीर रूपमा लागू पदार्थ र मदिरामा लतग्रस्त भए, तर १९९० पछि उनी पूर्ण रूपमा स्वच्छ र मदिरामुक्त छन्। २००५ मा, उनले आफ्ना लामो समयदेखि रहेका प्रेमी, क्यानाडेली फिल्म निर्माता डेभिड फर्निससँग सिभिल पार्टनरसिपमा प्रवेश गरे। २०१४ मा, जब इंग्ल्याण्ड र वेल्समा समलिंगी विवाहलाई कानुनी मान्यता दिइयो, उनीहरू वैवाहिक सम्बन्धमा बाँधिए।

जोनले यूके सिंगल्स चार्ट र यूएस बिलबोर्ड हट १०० मा ५० भन्दा बढी टप-४० हिट्स प्राप्त गरेका छन्, जसमा यूके र यूएस दुबैमा नौवटा नम्बर-वन गीतहरू समावेश छन्। साथै, यूएसमा लगातार सातवटा नम्बर-वन एल्बमहरू निकाल्ने दुर्लभ उपलब्धि पनि उनको नाममा छ। यूएस बिलबोर्ड चार्टको इतिहासमा उनी सबैभन्दा सफल एकल कलाकार मानिन्छन्।