काइलियन एम्बाप्पे

काइलियन एम्बाप्पे

एम्बाप्पे २०१८ फिफा विश्वकपमा फ्रान्सको प्रतिनिधित्व गर्दै
व्यक्तिगत विवरण
पुरा नाम	काइलियन सन्मी एम्बाप्पे लोट्टिन
जन्म मिति	(१९९८-१२-२०) २० डिसेम्बर १९९८
जन्म स्थान	पेरिस, फ्रान्स
उचाई	१.७८ मी (५ फिट १० इन्च)
खेल्ने स्थान	अग्रपंक्ति
क्लबको विवरण
हालको क्लब	पेरिस सेन्ट-जर्मेन
सङ्ख्या	७
युवा क्लब
२०१०-२०१३	बोन्डी सिएफ
२०११-२०१३	क्लार्फोटेईन
२०१३-२०१५	मोनाको
वरिष्ठ क्लब*
बर्ष	क्लबहरू	खेल	(गोल)
२०१५-२०१६	मोनाको	१२	(५)
२०१५– २०१७	ए एस मोनाको एफसी	४१	(१७)
२०१७–२०१८	पेरिस सेन्ट-जर्मेन (रिणमा)	२७	(२)
२०१८–	पेरिस सेन्ट-जर्मेन	२९	(३३)
राष्ट्रिय टोली†
२०१४-२०१५	फ्रान्स-१८	२	(०)
२०१६	फ्रान्स-१९	११	(७)
२०१७–	फ्रान्स	३०	(१२)
सम्मान पुरुष फुटबल प्रतिनिधित्वफ्रान्स फिफा विश्वकप विजेता २०१८ रुस
बरिष्ठ फुटबल क्लबमा उपस्थिति तथा खेल्दा गरेको गोल (गोललाई घरेलु लिगमा गरेको गनिनेछ) नवीनतम जानकारी ००:०८, ४ अक्टोबर २०१८ (युटिसी). † राष्ट्रिय टोलीमा उपस्थिति तथा खेल्दा गरेको गोलहरूको नवीनतम जानकारी ००:०८, ०४ अक्टोबर २०१८ (युटिसी)

काइलियन एम्बाप्पे(Kylian Sanmi Mbappé Lottin) (फ्रान्सेली उच्चारण: [kiljan (ə)mbape]; जन्म २० डिसेम्बर १९९८) एक फ्रान्सेली व्यवसायिक फुटबल खेलाडी हुन् । १९ वर्षको उमेरमा, उनलाई विश्वकै उत्कृष्ट युवा फुटबलर घोषणा गरियो । साथै उनलाई फुटबल जगतको उदाउँदो नक्षत्रको रूपमा पनि चित्रण गरिएको छ । बोन्डी युथ एकेडेमीमा हुँदै एम्बाप्पेको चर्चा चुलिएको थियो जसका कारण फ्रान्सको व्यवसायिक फुटबल क्लब एएस मोनाकोले उनलाई व्यवसायिक फुटबलमा डेब्यु गर्ने निम्तो दियो । सन् २०१५ मा मोनाकोबाट डेब्यु गरेसँगै उनी आफ्नो जादुयी खेलले प्रशिक्षक, समकक्षी र दर्शक सबैको ध्यान आफूतिर केन्द्रित गर्न सफल भए । उनकै उत्कृष्ट प्रदर्शनका बलले मोनाको सन् २०१६-१७ को लिग-१ उपाधी जित्न सफल भयो । यो उपाधी मोनाकोले १७ वर्षपछी जितेको थियो । एक वर्षपछी, फ्रान्सेली क्लब फुटबलको महारथी पेरिस सेन्ट-जर्मेनले एम्बाप्पेलाई आफ्नो क्लबमा भित्रायो । यसरी एम्बाप्पेलाई आफ्नो क्लबमा ल्याउन पिएसजीले १८ करोड युरो खर्च गरेको थियो । २०१७ को डिसेम्बरमा एम्बाप्पेले युइएफए च्याम्पियन्स लिगको दशौँ गोल गरे । यसो गर्ने एम्बाप्पे सबैभन्दा कान्छा खेलाडी हुन् । व्यवसायिक फुटबलमा डेब्यु गरेको साल एम्बाप्पेले मोनाको लाई लिग-१, कप डी फ्रान्स र कप डी ला लिग गरी तिन विभिन्न ट्रफि (ट्रेबल) जिताएका थिए । २०१७ मा फ्रान्सको राष्ट्रिय टिमबाट डेब्यु गर्नु अघि एम्बाप्पेले फ्रान्सको १७ र १९ वर्ष मुनिको फुटबल टिमबाट समेत फ्रान्सको प्रतिनिधित्व गरेका थिए । २०१८ फिफा विश्वकपमा एम्बाप्पे फ्रान्सको लागि विश्वकपमा गोल गर्ने सबभन्दा कान्छा खेलाडी बने । त्यस्तै पेले पछि विश्वकप फुटबलको फाइनलमा गोल गर्ने दोस्रो टिनएजर बने - एम्बाप्पे । फ्रान्सले २०१८ फिफा विश्वकपको उपाधी जित्दा उनी प्रतियोगिताकै दोस्रो सर्वाधिक गोलकर्ता मध्येका एक थिए । सो विश्वकपमा उनले बेस्ट योङ् प्लेयर अवार्ड जितेका थिए ।

प्रारम्भिक जीवन

फ्रान्सको राजधानी शहर पेरिसमा जन्मिएका एम्बाप्पेका वुवा विलफ्रिड एम्बाप्पे क्यामरूनमा जन्मिएका हुन् । उनी फुटबल प्रशिक्षक समेत हुन् । त्यस्तै काइलियन एम्बाप्पेकी आमा फेजा लमारी पनि अफ्रिकी मुलुक अल्जेरियामा जन्मिएकी हुन् जो पुर्व हेन्डबल खेलाडी हुन् । काइलियनका भाइ इथान एम्बाप्पे पेरिस सेन्ट-जर्मेनको १२ वर्ष मुनिको फुटबल टिमबाट खेल्ने गर्छन् । काइलियनका बाबुले धर्मपुत्र पालेका थिए जसको नाम केम्बो इकोको हो जो एक व्यवसायिक फुटबलर नै हुन् । एम्बाप्पे बाल्यकालमा क्रिस्टियानो रोनाल्डोका तस्विर र पोस्टरहरू आफ्नो कोठाको भित्तामा सजाउने गर्दथे ।

क्लब जीवन

प्रारम्भिक करियर

"उसँग तकनीकी कौशल र भिजन छ जुन अधिकांश केटाकेटीमा हुँदैन । उसको टाउको पछाडी आँखा छ । कहाँ हानेको बल कता जान्छ भनेर उसले पुर्वानुमान लगाउन सक्छ ।”

एट्मेन एरूची, एएस बोन्डी क्लबका अध्यक्षको भनाई, एम्बाप्पेका बारेमा

एम्बाप्पेले आफ्नो फुटबल करियर आफ्नै वुवाले प्रशिक्षण दिने एएस बोन्डीबाट सुरू गरेका हुन् । एएस बोन्डीकै अर्का प्रशिक्षक एन्टोनियो रिक्कार्डीले एम्बाप्पेको बारेमा भनेका छन्,

मैले पहिलो पटक उसलाई प्रशिक्षण दिँदा ऊ ६ वर्षको थियो । तपाईँ भन्न सक्नुहुन्छ कि ऊ अरूभन्दा पृथक थियो । काइलियनले अरू बच्चाले भन्दा धेरै राम्रो गर्न सक्छ । त्यतिबेलै उसको ड्रिब्लिङ् उत्कृष्ट थियो र ऊ अन्य बच्चा भन्दा धेरै छिटो दौडन्थ्यो । मैले यहाँ प्रशिक्षण गराएको १५ वर्ष भयो तर यो अवधिमा मैले भेटेका खेलाडी मध्यै ऊ नै उत्कृष्ट हो । पेरिसमा धेरै प्रतिभावान खेलाडी छन् तर ऊ जतिको प्रतिभावान खेलाडी मैले देखेको छैन । ऊ त्यो खेलाडी हो जसलाई हामी 'craque' (उत्कृष्ट) भन्छौँ ।

अचानक, उनी क्लेरफन्टाइन फुटबल एकेडेमी गए जहाँ उनले उत्कृष्ट प्रदर्शन गर्दै गर्दा कैयौँ कहलिएका फ्रेन्च क्लब, रियल म्याड्रिड, चेल्सी, लिभरपुल, म्यानचेस्टर सिटी र बायर्न म्युनिख जस्ता क्लबले उनलाइ ट्रान्सफरको निसानामा पारेका थिए । एम्बाप्पे ११ वर्षको हुँदा चेल्सीका लागि ट्रायल दिन लन्डन गए जहाँ उनले चेल्सीको युवा टिमबाट चार्लटन एथ्लेटिक क्लब विरूद्ध खेले । अन्तन: उनी आफ्नो व्यवसायिक फुटबल एएस मोनाकोबाट खेल्न थाले ।

मोनाको

२०१५–१६ सिजन

एम्बाप्पेले २ डिसेम्बर २०१५ मा फाबियो कोन्ट्राओलाई ८८ औँ मिनेटमा प्रतिस्थापन गर्दै लिग-१मा डेब्यु गरेका थिए । मोनाको को घरेलु मैदानमा खेलिएको सो खेल स्टेड मालहर्बी केन विरूद्ध थियो जुन १-१ को बराबरीमा सकियो । त्यसदिन एम्बाप्पे १६ वर्ष ३४७ दिनका थिए जसका कारण उनले मोनाकोको फर्स्ट टिमबाट खेल्ने सबभन्दा कान्छा खेलाडीको किर्तिमान बनाए जुन किर्तिमा २१ वर्ष अघि थिएरी हेनरीले बनाएका थिए ।

२० फेब्रुएरी २०१६ मा, एम्बाप्पले क्लबको फर्स्ट टिमबाट पहिलो गोल गरे । मोनाकोको घरेलु मैदानमा भएको लिग-१को सो खेलमा मोनाकोले ट्रोएज एसीलाई ३-१ ले पराजित गर्दा थिएरी हेनरीको अर्को किर्तिमान भङ्ग भएको थियो जसलाई एम्बाप्पेले अन्जाम दिएका थिए । सो खेलमा गोल गरेर एम्बाप्पे मोनाकोको इतिहाँसमा फर्स्ट टिमबाट गोल गर्ने सबभन्दा कान्छा खेलाडी (१७ वर्ष ६२ दिन) बनेका थिए ।६ मार्च २०१६ मा एम्बाप्पेले तिन वर्षसम्म (जुन २०१९ सम्म) मोनाकोमै आबद्ध रहिरहने गरी करार गरे ।

२०१६–१७ सिजन

२०१७ मा एम्बाप्पे मोनाकोका लागि वार्म अप गर्दै

१४ डिसेम्बर २०१६ मा २०१६-१७ कप डी ला लिगको नकआउट चरण (अन्तिम १६) मा मोनाकोले स्टेड रेन्नाइस एफसी लाई ७-० को फराकिलो अन्तरले पाखा लगाउँदा एम्बाप्पले आफ्नो फर्स्ट टिम करियरकै पहिलो ह्याट्रिक गरेका थिए ।

११ फेब्रुएरी २०१७ मा एम्बाप्पेले लिग-१मा करियरको पहिलो ह्याट्रिक गरेका थिए जुन खेल मोनाकोको घरेलु मैदानमा एफसी मेट्ज विरूद्ध भएको थियो । सो खेलमा मोनाको ५-० ले विजयी भएको थियो भने १८ वर्ष २ महिनाको उमेरमा लिग-१मा ह्याट्रिक गर्दै एम्बाप्पे सबभन्दा कम उमेरमा लिग-१ मा ह्याट्रिक गर्ने खेलाडी बनेका थिए । उनले जेरेमी मेनेजले २००५ मा राखेको किर्तिमानलाई भङ्ग गरेका थिए । १५ मार्चमा भएको युइएफए च्याम्पियन्स लिग को अन्तिम १६ को सेकेन्ड लेग म्याचमा बर्नार्डो सिल्भाको क्रसलाई आठौँ मिनेटमा गोलमा परिणत गर्दै एम्बाप्पेले मोनाकोलाई १-० को अग्रता दिलाए जुन खेलमा मोनाकोले म्यानचेस्टर सिटी फुटबल क्लबलाई ३-१ ले पराजित गर्यो । समग्रमा ६-६ गोल भएपनि मोनाको अवे गोलका आधारमा क्वार्टरफाइनलमा प्रवेश गर्यो । एम्बाप्पेले सम्पुर्ण प्रकारका प्रतियोगितामा ४४ खेलमा २६ गोल गर्दै २०१६-१७ को सिजन टुङ्ग्याए । अर्को सिजनमा एम्बाप्पे लोनमा पेरिस सेन्ट-जर्मेनमा गए ।

बाह्य कडी

• एम्बाप्पेको प्रोफाइल पेरिस सेन्ट जर्मेनको वेबसाइटमा
• प्रोफाइल फ्रान्स फुटबल सङ्घको आधिकारिक वेबसाइटमा
• काइलियन एम्बाप्पे – फिफा प्रतियोगिता तथ्याङ्क
• काइलियन एम्बाप्पे – यूइएफए प्रतियोगिता रेकर्ड