जिपिआरएस
जनरल प्याकेट रेडियो सर्भिस (जिपिआरएस), जसलाई एउटा मोबाइल डाटा मानक हो जुन टुजी मोबाइल फोन सञ्जाल विश्वव्यापी मोबाइल सञ्चार प्रणालीको एक भाग हो।[१] जिपिआरएस सुविधायुक्त सञ्जाल र मोबाइल उपकरणहरूको सुरुवात सन् २००१ को आसपासबाट भएको थियो।[२] यसले पहिलो पटक जिएसएम नेटवर्कमा "सधैं अन" जडानका लागि प्याकेट-स्विच्ड डाटाको प्रयोग गरी निरन्तर डाटा प्रसारणको सुविधा प्रदान गरेको थियो, जसले गर्दा इन्टरनेट चलाउनका लागि डायल-अप गर्नुपर्ने आवश्यकतालाई अन्त्य गरिदिएको थियो।[३] यसले वेब, इमेल, वायरलेस एप्लिकेसन प्रोटोकल सेवाहरू, छोटो सन्देश सेवा, र मल्टिमिडिया म्यासेजिङ सर्भिसका लागि परिष्कृत इन्टरनेट पहुँच प्रदान गरेको छ।[४]
यसको सुरुवात हुनुभन्दा अघि, सेलुलर नेटवर्कहरूमा केवल सर्किट-स्विच्ड डाटाको प्रयोग हुन्थ्यो, जसको अर्थ डाटा जडानको सम्पूर्ण अवधिभर एक वा बढी रेडियो च्यानलहरू ओगटिएका हुन्थे। यसको विपरीत, जिपिआरएस नेटवर्कमा डाटालाई साना प्याकेटहरूमा विभाजन गरिन्छ र उपलब्ध च्यानलहरू मार्फत प्रसारण गरिन्छ।[५] यो बढेको दक्षताले यसलाई ५६–११४ किलोबिट प्रति सेकेन्डको सैद्धान्तिक डाटा दर प्रदान गर्दछ,[६] जुन यसअघिको सर्किट स्विच्ड डाटा प्रविधिभन्दा निकै छिटो थियो। जिपिआरएस पछि एज ("२.७५जी") आएको थियो जसले टुजी जिएसएम प्रणालीमा अझ राम्रो प्रदर्शन र गति प्रदान गरेको थियो।
सन्दर्भ सामग्रीहरू
[सम्पादन]- ↑ "Is General Packet Radio Service (GPRS) 2G, 3G or 4G?", अन्तिम पहुँच २०२३-०७-१६।
- ↑ "Q&A: GPRS phones", २००१-०५-१८, अन्तिम पहुँच २०२३-०७-१६।
- ↑ "Industry's mobile hopes", २००१-०३-२३, अन्तिम पहुँच २०२४-०६-१८।
- ↑ "Q&A: GPRS phones", २००१-०५-१८, अन्तिम पहुँच २०२४-०६-१८।
- ↑ Backgrounds regarding data transmission in GSM and UMTS mobile networks, SMA Solar Technology AG।
- ↑ "General packet radio service from Qkport", मूलबाट २०१०-०१-२८-मा सङ्ग्रहित, अन्तिम पहुँच २००९-१२-१४।