दीपुचन्द्र दासको बर्बरतापूर्वक हत्याकाण्ड

दीपुचन्द्र दासको बर्बरतापूर्वक हत्याकाण्ड
स्थान	स्क्वायर मास्टरबाडी क्षेत्र, भालुका, मयमनसिंह, बङ्गलादेश
मिति	सन् २०२५ डिसेम्बर १८ लगभग रातको ९ बजे (बङ्गलादेशको प्रमाणिक समय (युटिसी+०६:००)
आक्रमणको प्रकार	भीडद्वारा गरिएको हिंसा, बर्बरतापूर्वक गरिएको हत्याकाण्ड
मृत्यु	१
पीडित	दीपुचन्द्र दास (उमेर अन्दाजी, २५,२७ वा ३०)
अपराधीहरू	१४०–१५० जनाको भीड (प्रहरी तथ्याङ्क अनुसार)
उद्देश्य	ईश्वरनिन्दाको आरोप

सन् २०२५ डिसेम्बर १८ का दिन एक कारखानाको कार्यक्रममा इस्लामको बारेमा अपमानजनक टिप्पणी गरेको आरोपमा दीपुचन्द्र दास नामक एक हिन्दू व्यक्तिलाई मयमनसिंहको भालुका भन्ने ठाउँमा कुटपिट गरी हत्या गरिएको थियो। यस घटनालाई लिएर अनुसन्धान थालेको प्रहरी बल र र्‍यापिड एक्सन बटालियनले कुनै पनि प्रमाणले ईशनिन्दाको आरोपलाई समर्थन नगरेको र यो घटना लामो समयदेखि चलिरहेको श्रम विवादसँग जोडिएको बताएको थियो। दीपुको हत्या नियतवश गरिएको र घटना लामै समयसम्म चलिरहेको अधिकारीहरूले बताएका थिए। उनको मृत्यु पश्चात् भीडले उनको शवलाई रुखमा बाँधेर आगो लगाइदिएका थिए। बङ्गलादेशमा विद्यार्थी नेता सरिफ ओस्मान हादीमाथि भएको आक्रमण र हादीको मृत्युपछि उब्जिएको व्यापक अशान्तिको समयमा यो घटना घटेको थियो।

पृष्ठभूमि

यो हत्याकाण्ड बङ्गलादेशमा बढ्दो हिंसाको पृष्ठभूमिमा घटेको थियो। आउँदै गरेको निर्वाचनमा ढाका-८ निर्वाचन क्षेत्रका स्वतन्त्र उम्मेदवार तथा एक प्रमुख युवा नेता ओस्मान हादी अज्ञात हतियारधारीहरूद्वारा चलाइएको गोली लागि घाइते भएका थिए भने उनको उपचारको क्रममा निघन भएका थियो। हादी सन् २०२४ को विरोध प्रदर्शनका एक मुख्य व्यक्तित्व थिए जसले प्रधानमन्त्री शेख हसिनालाई अगस्ट २०२४ मा पदबाट हटाउनमा भूमिका खेलेका थिए। उनको मृत्युले देशव्यापी रूपमा हिंसात्मक विरोध प्रदर्शन उत्पन्न गरेको र विरोध प्रदर्शनको फलस्वरूप सञ्चार माध्यमका कार्यालय, सांस्कृतिक संस्था र भारतीय कूटनीतिक मिसनहरूमा आक्रमण गरिएको थियो।

अल्पसङ्ख्यकहरूमाथिको हिंसा

शेख हसिनाको सरकार अपदस्त भएपछि बङ्गलादेशमा हिन्दु अल्पसङ्ख्यक समुदायमाथिको हिंसामा उल्लेखनीय वृद्धि भएको देखिन्छ। सन् २०२२ को बङ्गलादेश राष्ट्रिय जनगणनाका अनुसार, बङ्गलादेशमा लगभग १ करोड ३१ लाख हिन्दुहरू थिए जसले देशको जनसङ्ख्याको लगभग ७.९५ प्रतिशत अंश बनाउँदछ।