दैजिङ उत्सव

दैजिङ उत्सव
प्रारम्भ	डिसेम्बर २७
समापन	जनवरी ७
आवृत्ति	वार्षिक

दैजिङ उत्सव (अङ्ग्रेजी: Dwijing Festival) वा आई नदी उत्सव असम राज्यको चिराङ जिल्लामा आई नदीको किनारमा हाग्रामा पुल नजिक आयोजना गरिने एक वार्षिक नदी–उत्सव हो। यो उत्सव हरेक वर्ष १२ दिनसम्म (२७ डिसेम्बरदेखि ७ जनवरीसम्म) मनाइन्थ्यो।

शब्दको उत्पत्ति

“दैजिङ” शब्द बोडो भाषाबाट आएको हो, जसमा दैको अर्थ “पानी” र जिङको अर्थ “नदी किनारा” हो। आई नदीको किनारमा यो उत्सव मनाइन्थ्यो, जससँग स्थानीय बोडो समुदायको गहिरो सांस्कृतिक सम्बन्ध छ।

इतिहास

दैजिङ उत्सवको सुरुवात असम पर्यटन विभाग, असम पर्यटन विकास निगम र बोडोल्याण्ड पर्यटनको संयुक्त आयोजनामा सन् २०१६ मा भएको थियो। यसको मुख्य उद्देश्य नदी पर्यटनलाई प्रोत्साहन गर्नु र बोडोल्याण्ड क्षेत्रको संस्कृति र परम्परालाई विश्वसामु प्रस्तुत गर्नु थियो। चौथो र अन्तिम पटक यो उत्सव सन् २०१९–२० को हिउँदमा आयोजना गरिएको थियो।

उत्सव

यो उत्सव हाग्रामा पुल नजिक आयोजना गरिन्थ्यो, जुन असमको सबैभन्दा लामो ग्रामीण नदी पुल हो। यहाँ जनजातीय व्यापार, खाद्य–संस्कृति, खेलकुद, साहसिक गतिविधि, नदी राफ्टिङ, हेलिकप्टर भ्रमण र सांस्कृतिक कार्यक्रमहरू आयोजना गरिन्थे। बलिउडका थुप्रै प्रसिद्ध कलाकारहरूले पनि यहाँ प्रदर्शन गरेका थिए। यस उत्सवले स्थानीय जनजीवनमा सुधार ल्याउने, नयाँ रोजगारी सिर्जना गर्ने र आर्थिक रूपमा क्षेत्रलाई सशक्त बनाउने उद्देश्य बोकेको थियो।