पन्ना काजी शाक्य

गायक पन्ना काजी शाक्य
जन्म	वि.सं. १९८८ पुष १५ ओम बहाल, काठमाडौँ, नेपाल
मृत्यु	वि.सं. २०७३ माघ १२ टेकु, काठमाडौँ, नेपाल
राष्ट्रियता	नेपाली
जातीयता	नेवारी
नागरिकता	नेपाली

पन्ना काजी शाक्य (सन् १९३२ जनवरी ८ - सन् २०१७ जनवरी २५) एक नेपाली गायक थिए। उनका ‘तिरिरी मुरली बज्यो बनैमा’,‘कस्को यो सम्झना मेरो मनैमा’ लगायतका गीतहरूले चर्चा पाएको थियो। वि.सं. २००७ सालमा रेडियो नेपाल प्रवेश गरेका पन्ना काजी नेपाली साङ्गीतिक क्षेत्रमा सक्रिय रहेका थिए।

जीवनी

वि.सं. १९८८ साल पौष १५ मा काठमाडौँको ओम बहालमा जन्मिएका उनी परिवारका कान्छा छोरा थिए। उनका छोराहरू प्रवेशमान शाक्य र पवित्रमान शाक्य समेत नेपाली सङ्गीतमा सक्रिय छन्।

साङ्गीतिक यात्रा

वि.सं. २००४ सालदेखि औपचारिक रुपमै गीत गाउन थालेका उनले ‘विषन्तरया मच्चादान’ र ‘कुँडाल’ लगायत नाटकमा समेत अभिनय गरेका थिए। वि.सं. २०२२ सालमा पन्ना काजीले रेडियो नेपालद्वारा आयोजित आधुनिक गीत प्रतियोगितामा गायनतर्फ पहिलो भएका थिए। राजा महेन्द्रका मनपर्ने गायकको रुपमा परिचित उनले रेडियो नेपालमा आधुनिक भजन, राष्ट्र्रिय भावको गीत, लोकगीत, नेपाल भाषा लगायत झण्डै चार सय गीतहरू गाएका थिए। उनको ‘लिजेन्ड अफ पन्ना काजी, कसरी बिर्सुं म’, ‘लिजेन्ड अफ पन्नाकाजी: आफ्नो संसार’ र ‘साधक गायक पन्नाकाजी’ लगायत एल्बम सार्वजनिक भइसकेका थिए।

सम्मान तथा पदक

उनले नातिकाजी सम्मान, वीरेन्द्र पदक, गोरखा दक्षिण बाहु र इमेज लाइफटाइम अचिभमेन्ट अवार्ड लगायत प्राप्त गरेका थिए।

राजनीतिक जीवन

नेपाली कांग्रेससमेत क्रियाशील रहेका उनी २०१८ सालमा नौ महिना नख्खु जेल परेका थिए। त्यसताका उनले तयार गरेको गणेशमान सिंहको पाँच फिटको स्केच प्रदर्शनमै राखिएको थियो।