बिगफुट

बिगफुट

सन् १९६७ को प्याटरसन गिमलिन नामक चलचित्रमा, चलचित्र निर्माताहरूले महिला बिगफुटलाई चित्रण गर्ने दावी गरेका छन्।
उत्पत्ति
देश	क्यानडा अमेरिका
क्षेत्र	उत्तर अमेरिका

बिगफुट उत्तर अमेरिका, विशेष गरी प्रशान्त उत्तरपश्चिममा जङ्गलमा बसोबास गर्ने भनिएको ठूलो, रौँ भएको, पौराणिक प्राणी हो। बिगफुट अमेरिकी र क्यानेडिली लोककथा दुवैमा चित्रित छ, र २०औँ शताब्दीको मध्यदेखि एक सांस्कृतिक प्रतिमा बनेको छ। यसका साथै यो लोकप्रिय संस्कृतिमा व्याप्त छ र यसको आफ्नै विशिष्ट उपसंस्कृतिको विषय बनेको छ।

बिगफुटका बारेमा खोजी गर्ने व्यक्तिहरूले, बिगफुटको अस्तित्वलाई समर्थन गर्न विभिन्न प्रकारका शङ्कास्पद प्रमाणहरू प्रस्तुत गरेका छन्। यसमा देखिने गरिएका मौखिक दावीहरूका साथै कथित तस्वीरहरू, भिडियो र अडियो रेकर्डिङहरू, रौँका नमूनाहरू, र ठूला पाइलाका छापहरू समावेश छन्। यद्यपि, यी प्रमाणहरू लोककथा, गलत पहिचान, र ठगीको मिश्रण हुन्, र यो प्राणी कुनै वास्तविक जीवित जनावर भने होइन।

लोककथाविद्हरू बिगफुटको परिघटनालाई युरोपेली "जङ्गली मानव"को स्वरूप, लोककथाहरू, र आदिवासी संस्कृतिहरू जस्ता कारक र स्रोतहरूको मिश्रणको रूपमा हेर्दछन्। संसारभरि नै रौँले भरिएका जङ्गली मानव स्वरूपका जीवहरूका यस्तै लोककथाहरू अवस्थित छन्, जस्तै दक्षिण-पूर्वी अमेरिकाको 'स्कङ्क एप', एसियाका 'अल्मास', 'येरेन' र 'यती, अस्ट्रेलियाको 'योवी', र आदिवासी जनजातिहरूका पौराणिक कथाहरूमा पाइने यस्तै प्राणीहरू पर्दछन्। मानिसको इच्छापूर्ण सोच, वातावरणीय चिन्ताहरूमा भएको सांस्कृतिक वृद्धि, र यस विषयमा समाजको समग्र सचेतनालाई यसका थप कारकहरूका रूपमा लिइएको छ।

विवरण

बिगफुटको चित्रण

बिगफुटलाई प्रायः कालो, गाढा खैरो, वा गाढा रातो रौंले ढाकिएको, ठूलो, बलियो र दुई खुट्टाले हिँड्ने मानव वा वनमान्छे जस्तो प्राणीको रूपमा वर्णन गरिन्छ। प्रत्यक्षदर्शीहरूको भनाइ अनुसार यसको उचाई करिब ६ देखि ९ फिट (१.८–२.७ मिटर) अनुमान गरिएको छ, भने केही वर्णनहरूमा यसलाई १० देखि १५ फिट (३.०–४.६ मिटर) सम्म अग्लो भनिएको छ। केही कथित अवलोकनहरूले बिगफुटलाई वनमान्छे भन्दा बढी मानव जस्तै, विशेष गरी अनुहारको बनावटमा, चित्रण गरेका छन्। सन् १९७१ मा, ओरेगन राज्यको 'द ड्यालेस' मा धेरै व्यक्तिहरूले एउटा "विशाल वनमान्छे" देखेको भन्दै प्रहरी उजुरी दर्ता गराएका थिए, जसमा एक जनाले आफ्नो राइफलको निशानाबाट उक्त प्राणीलाई देखेको तर "जनावर भन्दा बढी मानव जस्तो देखिएकाले" गोली चलाउन नसकेको दाबी गरेका थिए।"

सामान्य वर्णनहरूमा यसका चौडा काँध, नदेखिने घाँटी र लामा हातहरू हुन्छन्, जसलाई धेरै सन्देहवादीहरूले सीधा उभिएको भालुलाई गलत पहिचान गरेको मान्दछन्। रातको समयमा देखिएका केही कथित घटनाहरूमा यस प्राणीका आँखाहरू पहेँलो वा रातो रङमा "चम्किएको" बताइएको छ। यद्यपि, मानिस र अन्य कुनै पनि ज्ञात वनमान्छेहरूमा पनि आँखाको चम्किने गुण नहुने भएकाले जङ्गलमा देखिएका यस्ता चम्किला आँखाहरूको सम्भावित व्याख्यामा रूखका पातहरूमा बसेका लाटोकोसेरो, रकुन, वा ओपोसमहरू, अथवा सीधा उभिएका भालुहरू हुन सक्ने बताइएको छ।

यस प्राणीको नाम जुन विशाल पाइलाका छापहरूका कारण राखिएको हो, ती २४ इन्च (६१० मिमी) सम्म लामा र ८ इन्च (२०० मिमी) सम्म चौडा हुने दावी गरिएको छ। पाइलाका केही ढाँचाहरूमा नङ्ग्राका चिन्हहरू पनि भेटिएका छन्, जसले गर्दा ती छापहरू भालु जस्ता ज्ञात जनावरहरूबाट आएको हुनसक्ने सम्भावना बलियो देखिन्छ, जसका पाँचवटा औँला र नङ्ग्राहरू हुन्छन्।

बाह्य कडीहरू

• बिगफुटसँग सम्बन्धित चित्र तथा श्रव्यदृश्यहरू विकिमिडिया कमन्समा रहेको छ।
• विकिकथनमा बिगफुट सम्बन्धित भनाइहरू रहेका छन्