रानी कामिला

कामिला
रानी कामिलाको औपचारिक तस्विर, सन् १०१९
संयुक्त अधिराज्यको रानी र अन्य राष्ट्रमण्डल क्षेत्रहरू
पदावधि	८ सेप्टेम्बर २०२२ – हालसम्म
राज्याभिषेक	६ मे २०२३
जन्म	कामिला रोजमेरी स्यान्ड (1947-07-17) १७ जुलाई १९४७ किङ्स कलेज अस्पताल, लन्डन, इङ्ल्यान्ड
जीवनसाथीहरू	एन्ड्रयु पार्कर बाउल्स ​ ( वि १९७३; सम्बन्धविच्छेद १९९५) चार्ल्स तृतीय ( वि २००५)
सन्तान	टम पार्कर बाउल्स लरा लोप्स
घराना	विन्डसर (विवाह मार्फत)
बाबु	ब्रुस स्यान्ड
आमा	रोजालिन्ड कुबिट
हस्ताक्षर	कामिलाको हस्ताक्षर
रानी कामिला शिक्षा क्विन्स गेट स्कुल पेरिसमा रहेको बेलायती संस्थान

कामिला (जन्म कामिला रोजमेरी स्यान्ड, पछि पार्कर बाउल्स, १७ जुलाई १९४७) राजा चार्ल्स तृतीयकी श्रीमतीको रूपमा संयुक्त अधिराज्यकी रानी र अन्य १४ राष्ट्रमण्डललीय क्षेत्रकी रानी हुन्।

कामिलाको बाल्यकाल इङ्ल्यान्डको इस्ट ससेक्स र साउथ केन्सिङ्टनमा बितको र र उनले इङ्ल्यान्ड, स्विट्जरल्यान्ड र फ्रान्स जस्ता देशहरूबाट शिक्षा हासिल गरेकी थिइन्। सन् १९७३ मा, उनले बेलायती सेनाका अधिकारी एन्ड्रयु पार्कर बाउल्ससँग विवाह गरेकी थिइन् भने उनीहरूको सन् १९९५ मा सम्बन्धविच्छेद भएको थियो। कामिला र चार्ल्स दुवैको पहिलो विवाह हुनु अघि र विवाहको समयमा पनि समय समयमा गोप्य सम्बन्ध रहेको थियो। उनीहरूको सम्बन्ध सञ्चारमाध्यममा धेरै चर्चाको विषय बनेपछि यो विश्वव्यापी निगरानीको विषय बनेको थियो। सन् २००५ मा, कामिला र चार्ल्सको विवाह विन्डसर गिल्डहलमा सम्पन्न भएको थियो भने यसपछि विन्डसर दरबारको सेन्ट जोर्ज च्यापलमा टेलिभिजन मार्फत एङ्ग्लिकन आशिर्वाद कार्यक्रम गरिएको थियो। उनीहरूको विवाहदेखि चार्ल्सको राज्यारोहणसम्म, उनलाई कर्नवालको डचेसको रूपमा चिनिन्थ्यो। ८ सेप्टेम्बर २०२२ मा, उनकी सासू रानी एलिजाबेथ द्वितीयको मृत्यु पछि चार्ल्स राजा र कामिला रानी बनेका थिए। चार्ल्स र कामिलाको राज्याभिषेक सन् २०२३ मे ६ का दिन वेस्टमिन्स्टर एबेमा सम्पन्न भएको थियो।

कामिलाले राजाको प्रतिनिधित्व गर्दै सार्वजनिक कार्यक्रमहरूमा भाग लिने गर्छिन् र उनी धेरै परोपकारी संस्थाहरूको संरक्षक पनि हुन्। सन् १९९४ देखि, उनले ओस्टियोपोरोसिस (हड्डी खिइने रोग) सम्बन्धि सचेतना जगाउन अभियान चलाउँदै आएकी छिन् जसका लागि उनले धेरै सम्मान र पुरस्कारहरू प्राप्त गरेकी छिन्। उनले बलात्कार, यौन दुर्व्यवहार, निरक्षरता, पशु कल्याण र गरिबी जस्ता मुद्दाहरूमा पनि सचेतना जगाउन अभियान चलाएकी छिन्।

रानीको रूपमा

आफ्नो राज्याभिषेकको दिनमा रानी कामिला

एलिजाबेथ द्वितीयको मृत्यु पश्चात् एलिजाबेथका छोरा चार्ल्स तृतीयको रूपमा राज्यारोहण गरेपछि कामिला सन् २०२२ सेप्टेम्बर ८ का दिन रानी बनेकी थिइन्। राष्ट्रका नाममा आफ्नो पहिलो सम्बोधनमा, चार्ल्सले कामिलाको "मायालु सहयोग र कर्तव्यप्रतिको अटल समर्पण" को लागि आफ्नी "प्रिय पत्नी" लाई सत्कार गरेका थिए। १० सेप्टेम्बरमा, उनी एक्सेसन काउन्सिल मा सहभागी भइन् जहाँ चार्ल्सलाई औपचारिक रूपमा राजा घोषित गरिएको र उनले आफ्ना सौतेनी छोरा विलियमसँगै साक्षीको रूपमा सेवा गरेकी थिइन्।

राज्यारोहण पश्चात्, कामिलाले परम्परागत लेडी-इन-वेटिङको भूमिकालाई हटाएर नयाँ रानीको सहयोगीको भूमिका सुरु गर्ने घोषणा गरेकी थिइन्। यो भूमिका तुलनात्मक रूपमा कम औपचारिक र कहिलेकाहीँ मात्र आवश्यक पर्ने खालको हुनेछ, जसमा उनीहरूले रानीलाई आधिकारिक कार्यक्रमहरूमा सहयोग गर्नेछन् तर पत्रहरूको जवाफ दिने वा दैनिक योजना बनाउने कार्यमा संलग्न हुने छैनन्। उनले यस भूमिकाका लागि मार्चियोनेस अफ ल्यान्सडाउन, ब्यारोनेस चिजोम अफ आउलपेन, जेन भोन वेनस्टेनहोल्ज, लेडी सारा केस्विक, लेडी ब्रुक र सारा ट्राउटनलाई नियुक्त गरेकी थिइन्।

सन् २०२३ फेब्रुअरी १३ का दिन बकिङ्घम राजदरबारले कामिलामा कोभिड-१९ संक्रमण पुष्टि भएको घोषणा गरेको थियो जसकारण उनले आफ्ना धेरै सार्वजनिक कार्यक्रमहरू स्थगित गर्नुपरेको थियो।

कामिलाको राज्याभिषेक ६ मे २०२३ मा लन्डनको वेस्टमिन्स्टर एबेमा चार्ल्ससँगै भएको थियो। १६ जुन २०२३ मा, बकिङ्घम राजदरबारले राजाले रानीलाई अर्डर अफ द थिसलमा नियुक्त गरेको घोषणा गरेको थियो। ५ जुलाईमा, उनी चार्ल्ससँगै सेन्ट जाइल्स क्याथिड्रलमा आयोजितराष्ट्रिय धन्यवाद सेवामा सहभागी भएकी थिइन् जहाँ उनलाई स्कटल्यान्डको सम्मान अर्पण गरिएको थियो। सोही महिनामा, अघिल्ला शाही राजकुमार फिलिपको विपरीत, रानी कामिलाले संसदीय नियमित भत्ता प्राप्त नगर्ने र उनका गतिविधिहरू यसको सट्टा राजकीय अनुदान मार्फत वित्त पोषित हुने घोषणा गरिएको थियो।

मार्च २०२३ मा, कामिलाले जर्मनीको राजकीय भ्रमणका लागि चार्ल्सलाई साथ दिएकी थिइन् जुन उनको राजाको रूपमा उनको पहिलो वैदेशिक भ्रमण थियो। सेप्टेम्बर र अक्टोबर २०२३ मा, राजा र रानीले फ्रान्स र केन्याको राजकीय भ्रमण गरेका थिए भने नोभेम्बरमा, कामिला राष्ट्राध्यक्षको रूपमा चार्ल्सको पहिलो संसद उद्घाटनमा उनीसँगै उपस्थित भएकी थिइन्।