हाउस अफ डेरेअन

हाउस अफ डेरेअनको प्रतीक चिन्ह

हाउस अफ डेरेअन (अङ्ग्रेजी: House of Deréon) गायिका तथा अभिनेत्री बियोन्से र उनकी आमा टिना नोल्सद्वारा स्थापित फेशन लाइन थियो । बियोन्सेकी हजुरआमा दर्जी एग्नेज डेरेअनको स्मृतिमा किशोरावस्था, व्यासक र प्रौढ गरी ३ पुस्ताका महिलालाई हुने खाले कपडा पाइन्थ्यो हाउस अफ डेरेअनमा । सन् २०१२ मा डेरेअनको उत्पादन बन्द गरिएको थियो ।

हाउस अफ डेरेअन

म फेब्रिक पसलको परिसरमा नै हुर्केकी हुँ । भाग्यले आमाले मलाई पसलमा बोलाई म र डेस्टिनीज चाइल्डका अन्य सदस्यहरूका लागि लुगा बनाइदिनुहुन्थ्यो । केही वर्ष पछि प्रशंसकहरूले पनि हाम्रा जस्ता लुगाहरू कता पाउँछ भनेर सोध्न थालेपछि यो लाइनको स्थापना गर्नु स्वभाविक नै थियो । म र मेरी आमाले सँगै यस्तो गर्न पाउँदा सँगै समय बित्नका साथै एक अर्काको फेशनबाट प्रेरणा लिन मिल्ने हुँदा म आफूलाई अत्यन्तै भाग्यशाली ठान्छु ।

— बियोन्से, हाउस अफ डेरेअनको बारेमा कुरा गर्दै

सन् २००६ मा "वेर द साइडवक एन्ड क्याटवक मीट" भन्ने ट्यागलाइनको साथमा डेरेअनलाई सार्वजनिक गरिएको थियो । यस लाइनमा पाइजामा र स्वेटशर्ट जस्ता सामान्य रूपमा लगाइने लुगाहरू निकालिएको थियो । हाउस अफ डेरेअनको परिचय दी ओपरा विनफ्री शोमा दिइएको थियो र द टायरा ब्याङ्क्स शोमा पनि देखिएको थियो । यो फेशन लाइनमा हिप हाप सङ्गीतबाट प्रभावित डेनिम कपडाका साथै परम्परागत कपडाको शैलीसँग मिलाइएको थियो ।

विभिन्न नयाँ प्रकारका लुगाहरू पाइने यस फेशन लाइनमा बियोन्सेको क्याडिल्याक रेकर्ड्समा एटा जेम्सको भूमिका निर्वाह गरेको क्षणबाट प्रभावित भई टिना नोल्सले पुराना शैलीमा बनेका लुगाहरू सार्वजनिक गरेकी थिइन् ।

बियोन्सेले आफ्नो एल्बम बीडेमा समावेश गरिएको "गेट मि बडीड" र र आइ एम...साशा फियर्समा समावेश गरिएको "सिङ्गल लेडिज (पुट रिङ अन इट)" मा पनि डेरेअनको नाम लिएकी थिइन् ।

लन्डनमा सार्वजनिकीकरण

न्यू योर्क फेशन सप्ताहमा उपस्थित भएकी बियोन्से लन्डन फेशन सप्ताहमा हाउस अफ डेरेअनको शिशिर ऋतुका लागि लुगा सार्वजनिक गर्न लन्डन, इङ्ल्यान्ड पुगेकी थिइन् । उक्त कार्यक्रममा चिप, एली गोल्डिङ, एलेक्जेन्ड्रा बर्क र रिता ओरा जस्ता हस्तीहरू उपस्थित थिए । बियोन्सेले कार्यक्रममा उनकी आमासँग सेक्विनको कालो सूट लगाएकी थिइन् । सिएनएनसँगको अन्तर्वार्तामा हाउस अफ डेरेअनको शिशिर/शरद सङ्ग्रहको बारेमा सोध्दा बियोन्सेले भनिन्,

यो सङ्ग्रह मेरो विश्व भ्रमणबाट प्रभावित भएको हो । म मेरी आमासँग विश्वभर नै टूरमा गएँ । एसिया, ब्राजिलको सौन्दर्यको प्रत्यक्ष आनन्द लिने अवसर पाएँ । म र मेरी आमाले हामीले देखेका सबै विविधतालाई समावेश गरी एउटा फेशन सङ्ग्रहको रूपमा सार्वजनिक गर्ने निर्णय गर्यौँ । अफ्रिकी कपालका साथै एसियाली कपडालाई समावेश गरेको यस सङ्ग्रहले चाहिँ हामीले सबै जातका मानिसहरूमा एकताको भावनाको विकास गराउन खोजेका छौँ ।

पहिले संयुक्त राज्यमा मात्रै उपलब्ध हाउस अफ डेरेअनलाई सेप्टेम्बर १७, २०११ मा आधिकारिक रूपमा विश्वव्यापी स्तरमा सार्वजनिक गराइएको थियो ।

उत्तर अमेरिकामा पुनः सार्वजनिकीकरण

सन् २०१२ मा हाउस अफ डेरेअनलाई नयाँ पहिरन तथा नयाँ शैलीका साथ सार्वजनिक गरिएको थियो । यस ब्र्यान्डमा पनि टिना नोल्सलाई नै प्रमुख डिजाइनरको भूमिकामा राखिएको थियो । यद्यपि, त्यही वर्ष हाउस अफ डेरेअन र बालबालिकाका लागि सार्वजनिक गरिएको डेरेअनको सामग्री उत्पादन गर्न बन्द गरियो ।

एग्नेज बियोन्से

एग्नेज बियोन्से (जन्म: एग्नेज डेरेअन; सन् १९०९ - सन् १९८४) एक लुइजियाना निवासी थिइन्, जसको पारिवारिक नाम र ससाना कुराहरूबाट विभिन्न रचना गर्ने कलालाई उनकी छोरी टिना नोल्स र नातिनी बियोन्से नोल्सले आफ्नो फेशन लाइनको प्रेरणाको स्रोत बनाएका थिए ।

एग्नेज डेरेअनको जन्म जुलाई १, १९०९ मा न्यू आइबेरिया, लुइजियाना नजिकै डेलकाम्ब्रे, लुइजियानामा यूजिन गुस्ताव "यूजिनी" डेरेअन (सन् १८६० - सन् १९३७) र ओडिलिया ब्रूसार्ड (इआर ब्रूसार्ड र जोसेफिन लेसरकी छोरी) की छोरीको रूपमा भएको थियो । उनी र उनको परिवार लुइजियाना क्रियोल थिए । स्वशिक्षित डेरेअन लुइजियानामा सिलाई गर्ने महिलाको रूपमा चर्चित थिइन् । सिलाईका विभिन्न शैलीको प्रयोग गर्ने डेरेअनद्वारा निर्मित लुगाहरू हाउस अफ डेरेअनको आधिकारिक वेबसाइटमा प्रदर्शन गरिएको थियो ।

डेरेअनले, पछि, लुइजियानाको एबिभिलका एलेक्जेन्डर बियोन्से र मरी ओलिभिएरका छोरा लुमिस बियोन्सेसँग विवाह गरी आफ्नो थर परिवर्तन गरिन् । उनीहरूले पछि टेक्ससको गाल्भेस्टनमा बसाइ सरी आफ्नो परिवार सुरु गरे । एग्नेज र लुमिस बियोन्से फ्रान्सेली भाषा बोल्ने फ्रान्सेली, अफ्रिकी र अमेरिकी मूलका क्रियोल जाति थिए ।

बियोन्से परिवार अत्यन्तै मिहिनेती थियो । आफ्ना छोराछोरीले राम्रो निजी विद्यालयमा पढ्न पाऊन् भनेर उनीहरूले कयौँ बलिदान दिएका थिए । एबनी पत्रिकासँगको अन्तर्वार्तामा टिना नोल्सले उनकी आमाले आफ्ना सन्तानलाई क्याथोलिक विद्यालयमा पढाउनका लागि गिर्जाघरमा लगाउने वस्त्र बनाउने काम गर्थिन् भन्ने खुलासा गरेकी थिइन् ।

विवाद

मे २००८ मा यस फेशन लाइनले "द डेरेअन गर्ल्स कलेक्शन" नामक विज्ञापन सार्वजनिक गर्यो । यस विज्ञापनमा सात वर्षका बालिकाहरूलाई मेक अप र हील जुत्तामा प्रदर्शन गरेको हुनाले नकारात्मक आलोचनात्मक प्रतिक्रिया पायो । द वाशिङटन पोस्टमा आयोजित चुनावमा ६२% पाठकहरूले त्यस विज्ञापनमा बालिकाहरूलाई कामुक दृष्टिकोणले दर्शाएको सहमति जनाएका थिए ।