पारिजात
नेपाली विकिपीडियाबाट
सुप्रसिद्ध साहित्यकार पारिजातको जन्म वि.सं. १९९४ वैशाख महिनामा लिंगिया चिया बगान, दार्जीलिङ मा भएको थियो । पिताको नाम डा. के. एस. वाइबा र माताको नाम अमृत मोक्तान थियो । उहाँ माता-पिताको तेस्रो सन्तान हुनुहुन्थ्यो । लामाहरूको उहाँको छेकुडोल्मा नाम राखिदिएका थिए । उहाँको अर्को नाम विष्णुकुमारी वाइबा हो । तर साहित्यमा उहाँ पारिजात नामले चिनिनुभयो । सानैमा आमाको माया-ममताबाट बञ्चित पारिजात अध्ययनलाई अगाडि बढाउने उद्देश्यले वि.सं. २०११ सालमा काठमाडौँ आउनुभयो । विद्यालयस्तरको अध्ययन दार्जिलिङमा नै पूरा गर्नुभएकी पारिजातले पद्मकन्या कलेज (तत्कालीन पाटना विश्वविद्यालय अन्तर्गतमा) भर्ना भई मानविकी तथा समाजशास्त्रमा स्नातक गर्नुभयो । २०१६ सालमा स्नातकोत्तर -अंग्रेजी विषमा) गर्न थालेपनि तीन वर्षसम्म शिक्षण पेशामा संलग्न भई मदन मेमोरियल हाइस्कूलमा पढाउनुभयो । स्नातकोत्तर तह पूरा गर्न सक्नु भएन । शरीर कुँजिने रोगका कारण शिक्षण छाडी लेखन र स्वाध्ययन थाल्नुभयो । पारिजात २०५० साल वैशाख ५ गते काठमाडौँमा दिवंगत हुनुभयो ।
[परिवर्तन्] प्रकाशित कृतिहरू
पारिजातका प्रकाशित कृतिहरू -
- आकांक्षा(कविता संग्रह, २०१४),
- शिरीषको फूल (उपन्यास, २०२२),
- महत्ताहीन (उपन्यास,२०२५),
- आदिम देश (कथासंग्रह, २०२५),
- बैँसको मान्छे (उपन्यास, २०२९),
- तोरीबारी, बाटा र सपनाहरू (उपन्यास, २०३२),
- सडक र प्रतिभा (कथासंग्रह,२०३२),
- अन्तर्मुखी (उपन्यास, २०३५),
- उसले रोजेको बाटो (उपन्यास,२०३५-'बेदना' पत्रिकामा प्रकाशित),
- पर्खालभित्र र पर्खाबाहिर (उपन्यास,२०३२ मा लेखिएको र २०३५ मा प्रकाशित),
- अनिंदो पहाडसँगै (उपन्यास, २०३९),
- साल्गीको बलात्कृत आँसु (कथा संग्रह, २०४३),
- धूपी, सल्ला र लालीगुराँसको फेदमा (संस्मरण, २०४३),
- पारिजातका कविताहरू (२०४४, ईश्वर बरालद्वारा सम्पादित),
- एउटा चित्रमय सुरुवात (संस्मरण, २०४५),
- परिभाषित आँखाहरू (उपन्यास, २०४६),
- बोनी (उपन्यास, २०४८),
- आधी आकाश (महिला मुक्तिसम्बन्धी लेखहरू, २०४८),
- बधशाला आउँदा जाँदा (कथासंग्रह, २०४९),
- वैशाख वर्तमान (कविता संग्रह, २०५०- मुत्युपछि प्रकाशित),
- अध्ययन र संघर्ष (संस्मरण,२०५१-मृत्युपश्चात प्रकाशित)
[परिवर्तन्] पुरस्कार तथा सम्मान
- २०२२ सालमा उहाँले शिरीषको फूल उपन्यासका लागि मदन पुरस्कार
- २०३९ सालमा गंकी-बसुन्धरा पुरस्कार
- २०५० सालमा बैंशालु वर्तमान कवितासंग्रहका निम्ति सर्वश्रेष्ठ पाण्डुलिपी पुरस्कार
- २०४८ सालमा त्रिभुवन विश्वविद्यालय सभा सदस्यमा मनोनित
- २०४८ सालमा त्रि.वि.द्वारा अभिनन्दित
- २०४९ सालमा नेपाल तामाङ घेदुङ संघद्वारा अभिनन्दित
- २०४९ मा 'जनमत' साहित्यिक मासिकद्वारा अभिनन्दित
उहाँको उपन्यास शिरीषको फूलको अंग्रेजी अनुवाद ब्लु मिमोसा अमेरिकाको मेरिल्यान्ड विश्वविद्यालयको पाठ्यक्रममा समाविष्ट छ ।
