गीत

गीत(गाना, गान) भनेको विशेषतः गाउनका निम्ति रचिएको लयात्मक सरस पद्यरचना हो। यो छन्द वा लयमा मिलाएर गाउन वा गुन्गुनाउन सकिने साहित्य पनि हो। गीतमा शब्द, लय र स्वरको उत्तिकै महत्त्व रहेको हुन्छ। रचनाका आधारमा गीतका दुई पक्ष हुन्छन् - साहित्यिक र लोकगीत।

इतिहास

गीतको प्रकाशन र प्रसारणको आरम्भको इतिहास अलग अलग समयमा भएको हो । नेपाली आधुनिक गीत लेखनको समय स्पष्टतः मोतीराम भट्टबाट सुरु भएको देखिन्छ भने रेकर्डिङ र प्रसारणका हिसाबले यस विधाको आरम्भ लगभग सबा सय वर्ष पूरा पुग्दैछ । यस अन्तरालमा धेरै साङ्गीतिक हस्तीहरूको उदय भयो र आधुनिक नेपाली सङ्गीतको प्रवर्धनमा तिनले उल्लेखनीय योगदान पुगाएका छन्। विभिन्न शैली, ढाँचा र परम्पराको उदय र प्रयोग यस अवधिमा भएको देखिन्छ। आदि गायक मानिएका सेतुराम श्रेष्ठको रेकर्ड भएको भजन ‘राम प्यारा छन्’ (वि.सं.१९६५) लाई नै आधुनिक नेपाली गीतको प्रसारणमा आरम्भ विन्दु मानिएको छ ।