एली गोल्डिङ
एली गोल्डिङ Ellie Goulding | |
|---|---|
 जुलाई २०१४ मा प्रस्तुति दिँदै गोल्डिङ | |
| जन्म | एलेना जेन गोल्डिङ ३० डिसेम्बर १९८६ हेर्फोर्ड, इङ्गल्याण्ड |
| मातृ शिक्षाप्रतिष्ठान | केन्ट विश्वविद्यालय |
| पेशा |
|
| कार्यकाल | २००९–वर्तमान |
कार्य | |
| जीवनसाथी | क्यास्पर जोप्लिङ
( वि २०१९; sep. २०२४) |
| सन्तान | २ |
| पुरस्कार | पूर्ण सूची |
| साङ्गीतिक जीवन | |
| विधा | |
| वाद्ययन्त्र |
|
| लेबल | |
| वेबसाइट | www |
एलेना जेन गोल्डिङ (जन्म ३० डिसेम्बर १९८६) एक बेलायती गायिका-गीतकार र कार्यकर्ता हुन्। हेर्फोर्डमा जन्मेकी र लायन्सहलमा हुर्किएकी गोल्डिङले १५ वर्षको उमेरदेखि गीत लेख्न थालेकी थिइन्। उनले सन् २००९ मा नियोन गोल्ड रेकर्ड्स मार्फत आफ्नो पहिलो एकल गीत "अन्डर द सिट्स" सार्वजनिक गरेकी थिइन् र सोही वर्ष पोलिडोर रेकर्ड्ससँग सम्झौता गर्दै आफ्नो पहिलो विस्तारित साङ्गीतिक सङ्गालो एन इन्ट्रोडक्सन टु एली गोल्डिङ सार्वजनिक गरेकी थिइन्। उनको पहिलो स्टुडियो एल्बम, लाइट्स (सन् २०१०), बेलायती एल्बम चार्टमा पहिलो स्थानमा रहन सफल भएको थियो। यसलाई पछि ब्राइट लाइट्सको रूपमा पुनः सार्वजनिक गरिएको थियो, जसमा एल्टन जोनको "योर सङ", "स्टारी आइड" र "लाइट्स" जस्ता सफल गीतहरू समावेश थिए।
गोल्डिङको दोस्रो स्टुडियो एल्बम, हल्सियन (सन् २०१२) सार्वजनिक हुनुअघि यसको मुख्य गीत "एनिथिङ कुड ह्याप्पन" सार्वजनिक गरिएको थियो। सन् २०१३ मा यसको परिमार्जित संस्करण हल्सियन डेज सार्वजनिक भएको थियो, जसको गीत "बर्न" संयुक्त अधिराज्यमा उनको पहिलो शीर्ष स्थानमा पुग्ने गीत बनेको थियो। त्यसपछि उनले डिजे क्याल्भिन ह्यारिससँग "आई निड योर लभ" र "आउटसाइड" जस्ता गीतहरूमा सहकार्य गरेकी थिइन्। आफ्नो तेस्रो स्टुडियो एल्बम डेलिरियम (सन् २०१५) र यसको मुख्य गीत "अन माई माइन्ड" पछि, गोल्डिङले फिल्म फिफ्टी सेड्स अफ ग्रे (सन् २०१५) को साउन्डट्र्याकका लागि रेकर्ड गरिएको गीत "लभ मी लाइक यु डु" का लागि ग्रामी पुरस्कार मनोनयन प्राप्त गरेकी थिइन्।
सन् २०१६ देखि २०२० सम्म गोल्डिङले साङ्गीतिक क्षेत्रबाट विश्राम लिएकी थिइन्। यस समयमा उनी चिन्ताको विकार र आफ्नो व्यक्तिगत जीवनका बारेमा सञ्चारमाध्यममा आएका गलत दाबीहरूसँग सङ्घर्षरत थिइन्। उनको चौथो स्टुडियो एल्बम, ब्राइटेस्ट ब्लु (सन् २०२०), बेलायती एल्बम चार्टको शीर्ष स्थानमा पुग्ने उनको तेस्रो एल्बम बनेको थियो। सन् २०२३ मा उनले ह्यारिससँग पुनः सहकार्य गर्दै "मिरेकल" सार्वजनिक गरेकी थिइन्, जुन गीत बेलायती सिङ्गल चार्टमा लगातार आठ हप्तासम्म पहिलो स्थानमा रहन सफल भएको थियो। गोल्डिङको पाँचौँ स्टुडियो एल्बम हायर देन हेभन (सन् २०२३) ले बेलायतमा पहिलो स्थानमा पुगेको थियो। यससँगै उनी संयुक्त अधिराज्यको इतिहासमा एडेलसँगै सबैभन्दा धेरै 'शीर्ष एल्बम' दिने बेलायती महिला कलाकार बन्न सफल भएकी थिइन्।
गोल्डिङले दुईवटा ब्रिट पुरस्कार, एक ब्रिट्स बिलियन पुरस्कार, एक बिलबोर्ड म्युजिक अवार्ड, र दुईवटा ग्रामी पुरस्कारमा मनोनयन सहित धेरै पुरस्कारहरू प्राप्त गरेकी छिन्। वातावरण संरक्षणमा आफ्नो माध्यमको प्रयोग गरेबापत उनलाई टाइम १०० ले 'इम्प्याक्ट अवार्ड' बाट सम्मानित गरेको थियो। उनले विश्वभर २ करोड ७० लाखभन्दा बढी एल्बम र २१ करोड ६० लाख एकल गीतहरू बिक्री गरिसकेकी छिन् र २१औँ शताब्दीको सबैभन्दा धेरै बिक्री हुने बेलायती महिला कलाकारहरूको सूचीमा पर्दछिन्।
बाल्यकाल
[सम्पादन गर्नुहोस्]एलेना जेन गोल्डिङको जन्म ३० डिसेम्बर १९८६ मा इङ्ल्यान्डको हेर्फोर्ड, हेर्फोर्डसायरमा आर्थर र ट्रेसी गोल्डिङको कोखबाट भएको थियो।[१] उनको पालनपोषण हेर्फोर्डसायरको एक सानो गाउँ लायन्सहलमा भएको थियो। उनका एक भाइ एलेक्स र दुई दिदीबहिनी इसाबेल र जोर्डन छन्। उनी पाँच वर्षकी छँदा उनका आमाबुबा छुट्टिएका थिए।[२] त्यसपछि उनको आफ्नो बुवासँग खासै सम्पर्क रहेनन्, जो एक अन्त्येष्टि निर्देशक थिए।[३] गोल्डिङ र उनका दाजुभाइ-दिदीबहिनीलाई उनकी आमाले सरकारी आवासमा हुर्काएकी थिइन्, जहाँ गोल्डिङले आफ्नो परिवारलाई "अत्यन्तै गरिब" भनेर वर्णन गरेकी छिन्।[४] गोल्डिङले आफ्नी आमासँगको सम्बन्ध "कठिन" रहेको बताएकी छिन्।[३]
गोल्डिङले नौ वर्षको उमेरदेखि क्लारिनेट बजाउन र १४ वर्षको उमेरदेखि गितार सिक्न थालेकी थिइन्। उनले किङ्गटन, हेर्फोर्डसायरस्थित लेडी हकिन्स हाई स्कुलमा अध्ययन गरेकी थिइन् र १५ वर्षको उमेरसम्ममा उनले गीतहरू लेख्न थालिसकेकी थिइन्। उनले अङ्ग्रेजी, राजनीति, नाटक र सङ्गीत विषय सहित तीनवटा विषयमा विशिष्ट श्रेणी साथ उत्तीर्ण भएकी थिइन् तर सङ्गीतमा भने असफल भएकी थिइन्।[५] उनले केन्ट विश्वविद्यालयमा नाटक र थिएटर अध्ययनमा स्नातकोत्तर लागि भर्ना भएकी थिइन्, तर आफ्नो अन्तिम वर्षमा पढाइ छोडेर अध्ययन पूरा गरिनन्।[६] जेमी लिलीह्वाइटसँगको भेटपछि, उनी गोल्डिङको प्रबन्धक बन्दै उनलाई निर्माता स्टारस्मिथसँग चिनाएका थिए, जो पछि उनको मुख्य सहकर्मी र गोल्डिङको पहिलो एल्बमको प्रमुख निर्माता बनेका थिए।[७]
सन्दर्भ सामग्रीहरू
[सम्पादन गर्नुहोस्]- ↑ "Ellie Goulding", The Music, अन्तिम पहुँच १९ मार्च २०२६।
- ↑ "The Fabulous Life of Ellie Goulding", Business Insider, २६ जुलाई २०२१। अभिलेखिकरण २४ सेप्टेम्बर २०२३ वेब्याक मेसिन
- 1 2 Brown, Helen, "Ellie Goulding: 'I Feel Really Stupid for Saying I Wasn't Affected by the MeToo Movement'", The Independent।
- ↑ Robinson, Peter, "Ellie Goulding: 'Can People Stop Thinking I'm Boring, Please?'", The Guardian।
- ↑ Rafanelli, Stephanie, "The Reinvention of Ellie Goulding", Evening Standard।
- ↑ Jeffreys, Branwen, "UK's First 'Super-University' To Be Created as Two Merge from 2026", बीबीसी।
- ↑ "Introducing... Starsmith", बीबीसी।
