हतारिँदै, बतासिँदै

"हतारिँदै, बतासिँदै"
सज्जन राज वैद्यको एकल
सार्वजनिक	सन् २०१९ जनवरी १
किसिम	स्वतन्त्र
लम्बाई	५:३०
गीतकार(हरू)	सज्जन राज वैद्य
सारङ्गी वादक - श्याम नेपाली

हतारिँदै, बतासिँदै नेपाली गीतकार सज्जन राज वैद्यद्वारा सन् २०१९ जनवरी १ मा जारी गरिएको गीत हो ।

पृष्ठभूमि

यो गीत एक मिल्ने साथीको परिप्रेक्ष्यबाट प्रेरित भएको वैद्यको भनाई छ । यस गीतले नायकको प्रेमकथाबारे आफ्नो प्रेमीसँग कुरा गरेको आभास हुन्छ । गीतको अवधिभित्र नायकले आफ्नो प्रेमीलाई उनको निरन्तर प्रयासलाई प्रमाणित गर्दै छिट्टै भेट्ने वाचा गर्छन् ।

यस गीतमा नेपाली लोक सङ्गीत र पाश्चात्य सङ्गीतको मिश्रण सुन्न सकिन्छ । गीतको मध्य भागमा श्याम नेपालीले सारङ्गी बजाउँछन् ।

भिडियो

यस गीतको प्रसिद्धिको एक प्रमुख कारण यसको भिडियो हो । नुर्बु लामाद्वारा निर्देशित यस गीतमा एउटा विषमयौनिक र एउटा समयौनिक जोडी देखाइन्छ । उक्त समयौनिक जोडीको पुनर्मिलन भन्दा अघिसम्म दुइटै जोडीको कथालाई समानान्तर रूपमा देखाइन्छ । पछि, भिडियोको अन्त्यमा ती जोडीहरू एउटै शटमा देखिन्छन् ।

भिडियोको सुरुवातमा दुइटा जोडी भएको कुरालाई लुकाउन खोजिएको जस्तो देखिन्छ । अन्त्यमा भिडियोमा समयौनिक जोडीको चुम्बन देखाएपछि कथाले नयाँ मोड लिन्छ । यस भिडियोले विषमयौनिक र समयौनिक जोडी दुबै सामान्य हुन् भन्ने देखाई एलजिबिटी समुदायमाथि प्रकाश पार्छ ।

नेपाली मिडियामा एलजिबिटी समुदायको प्रतिनिधित्व कम नै हुने भएर वैद्यले यो भिडियो बनाएको बताएका छन् । यो भिडियोले नेपालीहरूको एलजिबिटी समुदायप्रतिको दृष्टिकोण परिवर्तन गर्ने उद्देश्य राखेको छ ।

यो भिडियो निस्केपछि एलजिबिटी समुदायका साथै अन्य नेपालीहरूले पनि सामाजिक सञ्जालहरूमा आफ्नो सकारात्मक प्रतिक्रिया राखेका थिए ।

सार्वजनिकीकरण

देश	मिति	रेकर्ड लेबल
विश्वव्यापी	जनवरी १, २०१९	सज्जन राज वैद्य

निर्माण र उत्पादन

• गीतकार/रचनाकार: सज्जन राज वैद्य
• सारङ्गी: श्याम नेपाली
• निर्देशक: नुर्बु लामा
• छायाङ्कन: नुर्बु लामा, छेवाङ रिन्जिन
• सम्पादन: नुर्बु लामा, अभिनव भट्ट, सौम्य कार्की
• अभिनेता: जोन्साइ थापा, अर्हान्त श्रेष्ठ, इला लामा, अभिनव भट्ट
• प्रबन्धक: आरोग्य खड्का