बिगन रामको मादल

बिगन रामको मादल

लेखक	राजेन्द्र तारकिणी
भाषा	नेपाली
विषय	कवितासङ्ग्रह
प्रकाशक	शिखा बुक्स पब्लिकेशन
प्रकाशित मिति	वि.स. २०७९
पृष्ठ	१६०
पुरस्कार	प्रलेस युवा साहित्य पुरस्कार, २०७९

बिगन रामको मादल नेपाली भाषाको कविता सङ्ग्रह हो। यस कृतिका लेखक कवि राजेन्द्र तारकिणी हुन्। वि.सं. २०७९ सालमा काठमाडौँबाट शिखा बुक्स प्रकाशनले प्रकाशित गरेकाे यस सङ्ग्रहमा समाज, समय र राज्यसत्ता तथा अन्तर्राष्ट्रिय विषयवस्तुलाई केन्द्रमा राखेर लेखिएका सशक्त कविताहरू समेटिएका छन्।

तारकिणीकाे उक्त सङ्ग्रहका कविताबारे चर्चित कवि/लेखक श्यामलले भनेका छन्, 'कवितामा राजेन्द्रको चिन्ता शासकप्रतिको हाेइन, आमसामान्य मान्छेको चिन्ता छ। त्यसैले उनका कविता भूपि, रिमालका कविताकै चिन्तासँग मिल्दोजुल्दो छ।’ अर्का चर्चित कवि राजेन्द्र शलभले कविताको किताब पढिसकेपछि त्यसभित्रका कविता सम्झिइयो भने त्यस्तो कृतिलाई आफूले सफल कृति ठान्ने भन्दै यो कृतिलाई उनले सफल कृतिको संज्ञा दिएका छन् । [१] चर्चित युवाकवि निर्भीकजङ्ग रायमाझीले उक्त कृतिको समीक्षा गर्दै भनेका छन्, 'कविता कवि–मनको ऐना हो । र, तारिकिणीका कविता आजको समाज देखाउने सफेद ऐना ।' [२]

'बिगन रामको मादल' कृतिले वि.सं. २०७९ सालको प्रगतिशील लेखक सङ्घ युवा प्रतिभा पुरस्कार प्राप्त गरेको थियो। यस कृतिमा निम्न वर्गका पात्रहरूको उपस्थिति तथा तत्कालीन समाज र समयको प्रतिविम्ब उतारिएको पाइन्छ। यसै सन्दर्भमा कमल सुवेदीले कृतिको समीक्षा गर्दै भनेका छन्, ‘निरीहसित पनि शक्ति हुन्छ, पीडितसित पनि आँट र साहस हुन्छ र बाहिर शान्त देखिनेहरू पनि भित्रभित्रै उद्वेलित हुन्छन्, जसको प्रमाण नै हो प्रस्तुत कृति– बिगन रामको मादल।’

उक्त कृतिमाथि समीक्षा लेख्दै उमेश अवस्थी ‘आदर्श’ले भनेका छन्, 'कविले एक ठाउँमा यस्तो गहन विषय उठाएका छन्— यो देशको प्रथम प्रधानमन्त्रीले विष पिएर आत्महत्या गरे। जसको टाउको आजसम्म बेलायतको म्युजियममा छ रे ! त्यसयता भएका तमाम आत्महत्याको हिसाबकिताब कसले राख्छ ? चामलको बोरा किन्न खाडी पुगेका हरेरामले खाडीमै आत्महत्या गरे किन ?' [३] यसै कृतिको सन्दर्भमा प्राध्यापक एवं समालोचक ऋषि देवकोटाले काव्य हेतुका तीनवटै तत्त्व (प्रतिभा, व्युत्पत्ति र अभ्यास) मा कवि तारकिणी प्रतिस्पर्धा गर्न सक्ने हैसियत राख्ने बताएका छन् । उनी भन्छन्– काव्यिक आभूषण मानिने अलङ्कार र बिम्ब यी कविताहरूमा अत्यधिक राज गर्न सफल छन् । शब्दालङ्कार र वाच्यार्थको चमत्कारमा काव्यको आत्मा बोल्छ । रस ध्वनि र अलङ्कार ध्वनिको आधिक्यतामा कवि सरस शैलीमा हौसिएका छन् । [४]

यस सङ्ग्रहमा कवि तारकिणीद्वारा करिब एक दशकसम्म लेखिएका विभिन्न भाव र विषयका ५५ वटा कविताहरू सङ्कलित छन्। पुस्तक ६ खण्डमा विभाजित छ।