अन्तुडाँडा

अन्तु पोखरी

अन्तुडाँडा इलामको पर्यटकीय स्थल हो। इलाम जिल्लाको साविक श्रीअन्तु र सुलुबुङ गाविस हाल सूर्योदय नगरपालिकामा पर्ने अन्तुडाँडा समुद्र सतहबाट करिब २,३२८ मिटरको उचाइमा रहेको छ। श्री अन्तु समेत भनिने यो ठाउँ पुग्न इलामको फिक्कल बजारबाट छिपिटार, सिद्धिखोला हिरुवा हुँदै करिव २ घण्टा ट्याक्सीमा लाग्दछ। यस स्थानमा टेलिफोनको सुविधा लगायत खान र बस्न सामान्य होटलहरू रहनुको साथै घरदैलो कार्यक्रम अन्तर्गत होम स्टेको समेत व्यवस्था रहेको छ। भ्रमण गर्ने समय विशेष गरि असोज, कार्तिक, मङ्सिर र फागुन र चैतलाई उपयुक्त मानिन्छ भने अन्य समयलाई सामान्य रूपमा लिइन्छ।

अन्तुडाँडा सूर्योदय र सर्यास्तको दृश्यावलोकनको लागि प्रसिद्ध छ। यस बाहेक कञ्चनजङ्घा लगायतका हिमालको दृश्यावलोकन, अन्तु पोखरीको सुन्दरता, भारतको सिलिगुडी, खर्साङ, मिरिक र तराईका फाँटहरूको दृश्यावलोकन गर्न सकिन्छ। सौहाद्ध, आत्मीय र सहयोगी यहाँका बासिन्दाहरू र उनीहरूको परम्परा र संस्कृति, ग्रामीण खानपान र आफ्नै मौलिक जीवनशैलीको प्रत्यक्ष अनुभव गर्न सकिने पेइङ गेस्ट सुविधा अन्तु पर्यटकीय क्षेत्रको आकर्षण हो।