इमरान खान
इमरान खानको पुरा नाम इमरान अहमद खान नियाजी हो । उनको जन्म ५ अक्टोबर १९५२ मा भएको थियो । उनी एक पाकिस्तानी राजनीतिज्ञ र पूर्व क्रिकेटर हुन् । उनले अगस्ट २०१८ देखि अप्रिल २०२२ सम्म पाकिस्तानको २२औं प्रधानमन्त्रीको रूपमा सेवा गरेका थिए । प्रधानमन्त्री खानलाई विपक्षी दलहरुको गठबन्धनले अविश्वासको प्रस्ताव मार्फत पदच्युत गरेको हो । खानले आफू अमेरिकी विरोधी भएका कारण अमेरिकाले नै आफ्नो सरकार ढालेको आरोप लगाउँदै आएका छन् । उनी पाकिस्तानको सबैभन्दा ठूलो राजनीतिक दल पाकिस्तान तहरीक–ए–इन्साफ (पीटीआई) का संस्थापक र अध्यक्ष पनि हुन् । उनलाई विश्वको सबैभन्दा प्रभावशाली मुस्लिमहरूको सूचीमा समेत राखिएको छ । पञ्जाब, लाहोरको नियाजी पश्तुन परिवारमा जन्मेका खानले सन् १९७५ मा इङ्ल्यान्डको केबल कलेजबाट स्नातकसम्मको पढाई गरेका थिए । उनले आफ्नो अन्तर्राष्ट्रिय क्रिकेट करियर १८ वर्षको उमेरमा १९७१ मा इङ्ल्यान्डविरुद्धको टेस्ट शृङ्खलाबाट सुरु गरेका हुन् । खानले १९९२ सम्म क्रिकेट खेले, १९८२ र १९९२ को बीचमा उनले टीममा कप्तानको रूपमा सेवा गरेका थिए । उनको कप्तानीमा पाकिस्तानले पहिलोपटक १९९२ को क्रिकेट विश्व कप जित्यो । उनलाई क्रिकेटको महान अलराउन्डरहरू मध्ये एक मानिन्छ । खान आईसीसी क्रिकेट हल अफ फेममा समावेश छन् । उनले नमल कलेज पनि स्थापना गरेका छन्, जहाँ अधिकांश विद्यार्थीहरुको निःशुल्क पढाई हुन्छ । राजनीतिमा आउनुअघि उनले मृतक आमा सौकत खानमको सम्झनामा धेरै क्यान्सर अस्पतालहरू स्थापना गरेका थिए । उनले १९९६ मा पीटीआईको स्थापना गरे, जसले २००२ मा राष्ट्रिय सभामा सिट जित्यो । खानले २००७ सम्म मियाँवालीबाट विपक्षी दलको सांसदको रूपमा काम गर्दै आएका थिए । उनको दलले २००८ को चुनाव बहिष्कार गर्यो । २०१४ मा उनको दल पाकिस्तानको दोस्रो ठूलो पार्टी बन्यो । २०१८ को आम चुनावमा पीटीआई पाकिस्तानको सबैभन्दा ठूलो पार्टीको रूपमा देखा पर्यो । तर खानलाई प्रधानमन्त्री बनाउन उनको दलसँग पर्याप्त सांसद थिएनन् । त्यसपछि स्वतन्त्र र अन्य साना दलसँग गठबन्धन गरेर उनी सरकारमा आएका थिए ।