सन्त बङ्का

सन्त बङ्का (मराठी: संत बंका) वा सन्त वङ्का (मराठी: संत वंका) भारतको महाराष्ट्रमा चौधौँ शताब्दीमा जन्मेका कवि थिए । उनको विवाह चोखामेलाकी बहिनी सन्त निर्मलासँग भएको थियो । मेहेनपुरीमा जन्मेका बङ्का अछुत महार जातिका मानिस थिए । उनका अभङ्ग शैलीमा लेखिएका धेरैजसो कविताहरूमा उनले खुसी र शान्तिको भावनाका साथ विट्ठलको प्रशंसा गर्थे । विरलै उनी आफ्ना कवितामा आफ्नो जातिको कुरा निकाल्थे । यद्यपि, भक्ति कविका रूपमा उनले जाति तथा वर्ण व्यवस्थाको बारेमा लेखेका सबै कृति वर्तमान दलित साहित्यका लागि पनि अत्यन्तै महत्त्वपूर्ण मानिन्छ ।