वीरभद्र थापा

काजी वीरभद्र थापा
सैन्य सेवा
निष्ठा	गोरखा राज्य, नेपाल
श्रेणी	सरदार
लडाई/युद्धहरू	नुवाकोटको युद्ध, कीर्तिपुरको युद्ध, नेपाल एकीकरण

काजी वीरभद्र थापा नेपाल एकीकरणमा भाग लिने सैनिक अधिकारी थिए । कीर्तिपुरको युद्धमा उनले दलमर्दन शाह, दलजित शाह, कालु पाण्डे र तुलाराम पाण्डेसँगै भाग लिएका थिए । पृथ्वीनारायण शाहको एकीकरण अभियानमा बाधा पुर्याउन अङ्ग्रेज सिन्धुलीगढी आएका थिए । ढुङ्ग्रेबाँसमा युद्धको नेतृत्व वीरभद्रले गरेका थिए । उनी नुवाकोटको युद्धमा भाग लिने अग्रज भारदार मध्ये एक हुन् ।

थापा वंशावलीका अनुसार वीरभद्र थापा ज्यामरुककोटका राजा बगाले कुलका जसोधर (धर्मराज) थापाका २३औं पुस्ता देखिन्छन् । बडाकाजी अमरसिंह थापा पनि २३ औँ पुस्ता हुन भनी लेखिएको छ । उक्त वंशावली अनुसार उनी विक्रम थापाका नाति र विजय (बिजै) थापाका छोरा देखिन्छन् । तर इतिहास शिरोमणि बाबुराम आचार्यका अनुसार वीरभद्र विक्रमका छोरा हुन् र त्यसको साबित एक पत्रले गरेको छ: विक्रम थापाका नाति, वीरभद्र थापाका छोरा थर बगाल्या वतन गोर्षा अमरसिँह थापा।

उक्त पत्रमा उल्लेखित अमरसिंह थापा सानुकाजी हुन् । वीरभद्रका जम्मा तीन छोराहरू: जीवन थापा, वंशराज थापा र अमरसिंह थापा (सानुकाजी) हुन् । जीवन थापाको मृत्यु कालु पाण्डेसँगै कीर्तिपुरको युद्धमा भएको थियो । उनका नाति भीमसेन थापा नेपालको प्रथम मुख्तियार बन्न पुगे ।

स्रोत

पुस्तकहरू

• आचार्य, बाबुराम (१९६७), श्री ५ बडामहाराजधिराज पृथ्वीनारायण शाह: संक्षिप्त जीवनी, इ.सं. १७२३-७५ २–३, श्री ५ महाराजधिराज प्रेस सचिवालय। 
• प्रधान, कुमार लाल (२०१२), थापा पोलिटिक्स इन नेपाल: विथ स्पेशल रिफरेन्स टू भीमसेन थापा, १८०६–१८३९, नयाँ दिल्ली: कन्शेप्ट पब्लिसिङ्ग कम्पनी, आइएसबिएन 9788180698132।