सार्लेट फ्लेयर

सार्लेट फ्लेयर
सन् २०१५ मा फ्लेयर
वास्तविक नाम	एस्ली एलिजावेथ फ्लेहर
जन्म	(1986-04-05) ५ अप्रिल १९८६ नर्थ क्यारोलाइना, अमेरिका
जीवनसाथी(हरू)	रिकी जोनसन ​ ( वि २०१०; सवि २०१३) ब्राम ​ ( वि २०१३; सवि २०१५)
शिक्षा	उत्तर क्यारोलिना विश्वविद्यालय
व्यावसायिक कुस्ती जीवन
लोकप्रिय रिङ नाम	एस्ली फ्लेयर सार्लेट सार्लेट फ्लेयर
उचाई	५ फिट १० इन्च (१७८ सेमी)
उत्पत्ति	"उत्तर क्यारोलिना"
प्रशिक्षक	लोडी सारा डेल रे रिक फ्लेयर
पदार्पण	२०१२

एस्ली एलिजाबेथ फ्लेयर (जन्म:५ अप्रिल १९८६) एक अमेरिकी व्यावसायिक महिला कुस्ती खेलाडी, लेखिका र अभिनेत्री हुन्। उनी हाल डब्ल्युडब्ल्युईसँग आवद्ध छिन् जहाँ उनी स्म्याकडाउन ब्रान्डमा कार्यरत छिन्। उनी हाल सार्लेट फ्लेयर नामले कुस्ती खेल्ने गर्छिन्। उनी चर्चित कुस्ती खेलाडी रिक फ्लेयरकी छोरी हुन्।

सार्लेटले व्यवसायिक कुस्ती जीवनको सुरुवाती चरणमा आफ्नो बुबासँग वर्ल्ड च्याम्पियनसिप रेस्लिङमा देखा परेकी थिइन् भने उनले सन् २०१२ देखि डब्ल्युडब्ल्युईसँग प्रशिक्षण लिन सुरु गरेकी थिइन्। उनले सन् २०१३ मा डब्ल्युडब्ल्युईको विकासशील क्षेत्र एनएक्सटीमा आफ्नो कुस्ती कार्यकाल सुरुवात गरेकी थिइन्। सन् २०१४ मा सार्लेटले एनएक्सटी महिला च्याम्पियनसिप उपाधि हात पार्न सफल भएकी थिइन् र सोही वर्ष उनलाई प्रो रेस्लिङ इलुस्ट्रेटरले उत्कृष्ट नयाँ खेलाडीको सूचीमा राखेको थियो। सन् २०१५ मा फ्लेयर एनएक्सटीबाट पदोन्नति हुँदै डब्ल्युडब्ल्युईको मुख्य प्रदामा आएकी थिइन् र उनले सन् २०१६ मा डिभास च्याम्पियनसिप पनि जित्न सफल भएकी थिइन्। सन् २०१६ मा फ्लेयर पहिलो डब्ल्युडब्ल्युई महिला विजेता पनि बन्न सफल भएकी थिइन्। सन् २०१६ मा उनी र सासा बेङ्क्स पहिलोपटक महिला कुस्ती खेलाडीको रूपमा शीर्षकमा आएका थिए र उनीहरूको खेल इतिहासमै पहिलोपटक हेल इन अ सेल भित्र आयोजना गरिएको थियो। फ्लेयर र बेङ्क्सको खेल अक्टोबर र नोभेम्बर २०१६ मा आयोजना गरिएको थियो जुन सन् २००४ देखि डब्ल्युडब्ल्युईको इतिहासमा मुख्य खेलको रूपमा मान्यता प्राप्त गरेको थियो। उनीहरूले महिला कुस्ती क्षेत्रमा डब्ल्युडब्ल्युईमै सबैभन्दा लामो खेलको कीर्तिमान कायम गरेका छन् जुन सन् २०१६ को रोडब्लक: इण्ड अफ द लाइन पे-पर-भ्युमा आयोजना गरिएको थियो भने उक्त खेल ३४ मिनेट सम्म चलेको थियो। पिडब्ल्यूआई रिडरले सन् २०१६ मा उनलाई वर्षको उत्कृष्ट महिला खेलाडी र विश्वको उत्कृष्ट महिला कुस्ती खेलाडीको सम्मान दिएको थियो। उनको रोण्डा राउजी र बेकी लिञ्च विरुद्धको खेल रेसलमेनिया ३५ मा आयोजना गरिएको थियो जुन डब्ल्युडब्ल्युईको इतिहासमै पहिलो महिलाको खेल मुख्य खेल बन्न सफल भएको थियो।

फ्लेयरले हालसम्म डब्ल्युडब्ल्युईमा १० वटा उपाधिहरू जितेकी छिन् जसमा उनी एकपटक डिभास विजेता, पहिलो र चार पटक र महिला विजेता, ४ पटक स्म्याकडाउन महिला विजेता र एकपटक एनएक्सटी महिला विजेता बनेकी छिन्। डब्ल्युडब्ल्युईको इतिहासमै महिला उपाधिहरू सबै जित्ने उनी एक मात्रै महिला खेलाडी हुन् र उनी सबैभन्दा लामो समयसम्म स्म्याकडाउन महिला विजेता पनि बन्न सफल भएकी थिइन्। फ्लेयरले सन् २०१८ अक्टोबरमा इभोलुसन पे-पर-भ्युमा आयोजित पहिलो लाष्ट विमेन स्ट्यान्डिङ खेल खेलेकी छिन्। डब्ल्युडब्ल्युई रको एक श्रृङ्खलामा आउँदै रेसलमेनिया ३५ मा हुन लागेको रोन्डा राउजी र बेकी लिञ्चको खेलमा मिष्टर म्याकमेनले जनाए अनुसार फ्लेयरले लिञ्चको सट्टामा राउजीसँग रेसलमेनिया ३५ मा महिला च्याम्पियनसिपका लागि खेल खेल्ने घोषणा गरिएको थियो।

बाल्यकाल

फ्लेयरको जन्म उत्तरी क्यारोलिना स्थित सार्लेट सहरमा भएको थियो। उनको बुवा नाम रिक फ्लेयर हो भने आमाको नाम एलिजबेथ फ्लेयर हो। उनको एक जेठी सौतेनी दिदी मेगन, एक सौतेनी जेठो दाजु डेभिड र एक भाइ रिड फ्लेयर छन् जसको सन् २०१३ मार्च २९ मा निधन भएको थियो। फ्लेयरले उनी क्याम्पसमा अध्यन गर्दा भलिबल खेल्ने गर्थिन् भने उनले भलिबलमा आफ्नो क्याम्पसबाट कप्तानको भूमिकामा खेल्ने गर्थिन्। फ्लेयरले भलिबलमा विभिन्न पदकहरू पनि प्राप्त गरेकी छिन्।

व्यवसायिक कुस्ती कार्यकाल

वर्ल्ड च्याम्पियनसिप रेस्लिङ (सन् २०००)

सार्लेटले सन् २००० मा १४ वर्षको उमेरमा सार्लेटले उनको सुरुवाती चरणमा आफ्नो बुबासँग वर्ल्ड च्याम्पियनसिप रेस्लिङमा देखा परेकी थिइन् भने तात्कालिक समयमा रिक फ्लेयर र भिन्स रुसोसँग द्वन्द्व चलिरहेको थियो। जुन ११ मा ग्रेट अमेरिकन ब्यास नामक पे-पर-भ्युमा रिक फ्लेयर र डेभिडको खेलमा सार्लेट रिङको छेउमा बसेकी थिइन्। उक्त खेलमा रुसोले खेलमा हस्तक्षेप गर्न लागेको क्रममा उन र रिड फ्लेयरले रुसोलाई आक्रमण गरेका थिए जसका कारण रिक फ्लेयरले डेभिडलाई हराउन सफल भएका थिए।

डब्ल्युडब्ल्युई

द बिएफएफ (सन् २०१२–२०१४)

फ्लेयर सन् २०१४ मा

१७ मे २०१२ मा सार्लेटले डब्ल्युडब्ल्युईको विकासशील क्षेत्र उत्तरी क्यारोलिना स्थित एनएक्सटीमा प्रशिक्षण लिन सुरु गरेकी थिइन्। उनलाई तात्कालिक समयमा उनका प्रशिक्षण सारा डेर रे र लोरी थिए। फ्लेहरले १७ जुलाई २०१३ एनएक्सटीको एक श्रृङ्खलामा आफ्नो नाम सार्लेट राखेकी थिइन् र उनको पहिलो खेलमा उनले बेइलीलाई हराएकी थिइन्। सन् २०१३ को अन्त्य तिर ४ सेप्टेम्बर एनएक्सटीको एक श्रृङ्खलामा सार्लेटले बेइलीसँग साझेदारी गर्दै अक्साना र अलिसा फक्सको टोलीलाई हराएका थिए। अक्टोबर १० एनएक्सटीको एक श्रृङ्खलामा बेइलीले सार्लेटको साझेदारीमा सान्टाना गेरेटलाई हराएकी थिइन्। उक्त खेलको अन्त्यसँगै द बिएफएफ (सासा बेङ्क्स र समर रे) रिङमा आए र सार्लेट र बेइलीलाई उनीहरूको टोलीमा आउन आह्वान गरेका थिए।

१३ नोभेम्बर एनएक्सटीको एक श्रृङ्खलामा द बिएफएफको खेल सार्लेट र बेइलीको विरुद्धमा जारी गरिएको थियो भने उक्त खेलमा पनि बिएफएफ विजेता बनेका थिए। खेल सकिने बित्तिकै सार्लेटले बेइलीलाई आक्रमण गर्दै द बिएफएफसँग आवद्ध भएकी थिइन्। मध्य जनवरी २०१४ मा रे डब्ल्युडब्ल्युईको मुख्य कार्यसूचीमा आवद्ध भएपछि बेङ्क्स र सार्लेटले बेइलीसँग द्वन्द्व चलाएका थिए भने उता तिर बेइलीले पनि नेटालियासँग साझेदारी गर्दै एक टोली गठन गरेकी थिइन्। ६ अप्रिलमा बेङ्क्स रेसलमेनिया ३० मा देखा परेकी थिइन्। मे महिनामा बेङ्क्सले खालि रहेको एनएक्सटी महिला च्याम्पियनसिपका लागि एक प्रतिस्पर्धामा भाग जनाएकी थिइन् जहाँ उनले पहिलो चरणमा बेइलीलाई हराएकी थिइन् भने सेमिफाइनलमा उनी नेटालियासँग पराजित हुँदै प्रतिस्पर्धाबाट बाहिरिएकी थिइन्। जुलाई ३ एनएक्सटीको एक श्रृङ्खलामा बेङ्क्स र सार्लेटको जोडी बेइली र बेकी लिञ्चसँग पराजित भएका थिए।

एनएक्सटी महिला विजेता (सन् २०१४–२०१५)

सन् २०१४ मे महिनाको सुरुवातमा सार्लेटले खाली रहेको एनएक्सटी महिला च्याम्पियनसिपका लागि एक प्रतियोगितामा भाग जनाएकी थिइन् जहाँ उनले पहिलो चरणम एमा, सेमिफाइनलमा अलेक्सा ब्लिस र २९ मे २०१४ एनएक्सटी टेक अ‍ोभरमा आयोजित फाइनल खेलमा नेटालियालाई हराउँदै डब्ल्युडब्ल्युईको कार्यकालमा पहिलो च्याम्पियनसिप जित्न सफल भएकी थिइन्। एनएक्सटीबाट चार महिनाको अवकाश पछि जुन ६ एनएक्सटीको एक श्रृङ्खलामा समर रे फर्किएकी थिइन् र उनी आउने बित्तिकै सार्लेट र बेइली बीच चलिरहेको खेलमा अवरोध पुर्‍याउँदै सार्लेट द्वारा बेइलीलाई हराउन मद्दत गरेकी थिइन् र त्यसपछि द बिएफएफ पुन गठन भएका थिए। १२ जुन एनएक्सटीक‍ एक श्रृङ्खलामा बिएफएफले हार बेहोरेकी थियो जब बेइलीले सार्लेटलाई हराइन्। जुन ३ एनएक्सटीको एक श्रृङ्खलामा सार्लेट र सासा बेङ्क्सले बेइली र बिकी लिञ्चको जोडीलाई हराएका थिए। उक्त खेल पश्चात् सार्लेटले बेङ्क्सलाई रिङमा एक्लै छाडेकी थिइन् भने सोही दिन बेङ्क्सले द बिएफएफ पुर्णतया विघटन भएको घोषणा गरेकी थिइन्।

२४ जुलाई २०१४ एनएक्सटीको एक श्रृङ्खलामा सार्लेटले उनको एनएक्सटी महिला च्याम्पियनसिप सफलतापूर्वक समर रेलाई हराउँदै उपाधि जोगाएकी थिइन्। एनएक्सटी टेक अ‍ोभरमा आयोजित फेटल फोर वे खेलमा पनि सार्लेट विजेता बन्दै च्याम्पियनसिप जोगाएकी थिइन्। अक्टोबर २ एनएक्सटीक‍ एक श्रृङ्खलामा सार्लेट र बेइलीको खेल महिला च्याम्पियनसिपका लागि जारी गरिएको थियो जहाँ सार्लेटले बेइलीलाई हराएकी थिइन्। खेलको समाप्ति पछि सार्लेटले बेइलीसँग अङ्कमाल र हात मिलाइन् जसले गर्दा उनी खेल प्रेमी बीच प्रख्यात बनेकी थिइन्। उक्त खेलको केही हप्ता पछि सार्लेट र बेइलीले सासा बेङ्क्स र उनको साथी बेकी लिञ्चसँग द्वन्द्वको सुरुवात गरेका थिए। ८ डिसेम्बर सार्लेटले स्लामे अवार्ड कार्यक्रममा डब्ल्युडब्ल्युईको मुख्य पर्दामा देखा परेकी थिइन् जहाँ उनले एक उपाधि रहित खेलमा नेटालियासँग हार बेहोरेकी थिइन्। त्यसपछि एनएक्सटीमा सार्लेटको सासा बेङ्क्ससँग द्वन्द्वको सुरुवात गरेकी थिइन् जसका कारण ११ डिसेम्बरमा उनीहरूको खेल एनएक्सटी टेक ओभर: आर इभोलुसनमा जारी गरिएको थियो र उक्त खेलमा सार्लेटले बेङ्क्सलाई हराएकी थिइन्। बेङ्क्सले सार्लेटको उपाधिका लागि २५ डिसेम्बरमा पुन खेल खेलेकी थिइन् तर उक्त खेलमा पनि सार्लेटको जित भएको थियो। ११ फेब्रुअरी एनएक्सटी टिक ओभर: राइभलमा सार्लेटको सामना बेङ्क्स, लिञ्च र बेइलीको विरुद्धमा भएको थियो जहाँ बेङ्क्सले सार्लेटलाई हराउँदै पहिलोपटक एनएक्सटी महिला विजेता बन्न सफल भएकी थिइन्। बेङ्क्सले ४ मार्च एनएक्सटीको एक श्रृङ्खलामा सार्लेटको विरुद्धमा दाउमा लगाएकी थिइन् तर उक्त खेलमा सार्लेटले उपाधि जित्न असमर्थ बनिन्।

मे २० मा आयोजना गरिएको एनएक्सटी टेक अ‍ोभर: अनस्टपएबलमा सार्लेट र बेइलीले एमा र डेना ब्रुकको टोलीलाई हराएका थिए। ८ जुलाई एनएक्सटीको एक श्रृङ्खलामा एमा र डेना ब्रुकलाई पुन एकपटक हराएपछि सार्लेटले एनएक्सटी महिला च्याम्पियनसिपका लागि तात्कालिक महिला विजेता सासा बेङ्क्ससँग खेलको प्रस्ताव राखेकी थिइन् जुन बेङ्क्सले स्वीकार गरेकी थिइन्। उनीहरू बीच उपाधिका लागि खेल १५ जुलाई एनएक्सटीको एक श्रृङ्खलामा आयोजना गरिएको थियो जहाँ बेङ्क्सले सार्लेटलाई हराएकी थिइन्। खेल सकिएपछि सार्लेटले बेङ्क्सलाई सम्पन्न र आदर गर्दै बेङ्क्सको हात उठाइदिएकी थिइन्।

महिला कुस्तीमा क्रान्ति (सन् २०१५–२०१६)

सार्लेटले आधिकारिक रूपमा १३ जुलाई २०१५ डब्ल्युडब्ल्युईको मुख्य कार्यसूची र मा बेकी लिञ्च र सासा बेङ्क्सको साथमा पर्दापर्ण गरेकी थिइन्। लिञ्च र सार्लेटले पेजसँग साझेदारी गर्दै एक टोली गठन गर्दै टिम बेला (निकी बेला, ब्रि बेला र अलिसा फक्स)सँग द्वन्द्वको सुरुवात गरेका थिए भने सासा बेङ्क्सले नेयोमी र टमिनासँग साझेदारी गर्दै अर्को टोली गठन गरेका थिए जसलाई उनहरूले टिम ब्याड नाम राखेका थिए। उक्त तीन टोलीको द्वन्द्व त्यहीँबाट सुरुवात भएको थियो। पेज, लिञ्च र सार्लेटको जेडीले अन्ततः उनीहरूको टोलीको नाम पिसिबी राख्दै नयाँ रूपमा देखा पर्न सुरु गरेका थिए। सार्लेटले १९ जुलाई २०१५ मा आयोजित ब्याटलग्राउण्ड पे-पर-भ्युमा उनको पहिलो खेल खेलेकी थिइन् जहाँ उनले ट्रिपल थ्रेट खेलमा ब्रि बेला र सासा बेङ्क्सलाई हराउन सफल भएकी थिइन्। उक्त तीन टोलीको सामना अन्ततः समरस्ल्याममा आयोजना गरिएको थियो र उक्त खेलमा पिसिबीले दुई टोलीलाई हराउँन सफल भएका थिए।

रेसलमेनिया ३२ मा सार्लेट आफ्नो बुबा रिक फ्लेयरसँग

३१ अगस्ट २०१५ रको एक श्रृङ्खलामा पिसिबी टोलीको तीनै सदस्यले डिभास च्याम्पियनसिपका लागि पहिलो दावेदार बन्नका निमित्त पहिलो "डिभास बिट द क्लक च्यालेञ्ज" नामक एक प्रतिस्पर्धामा भाग लिएका थिए। उक्त खेलमा सार्लेट विजेता बन्दै डिभास विजेता निकी बेलासँग नाइट अफ च्याम्पियन्स पे-पर-भ्युमा उपाधिका लागि खेल खेल्न पाएकी थिइन्। नाइट अफ च्याम्पियन्स पनि पुन एकपटक सार्लेट र निकी बेलाको खेल डिभास च्याम्पियनसिपका लागि जारी गरिएको थियो भने उक्त खेलमा सार्लेटले निकीलाई हराउँदै पहिलोपटक डिभास विजेता बन्न सफल भएकी थिइन्। सार्लेट डिभास विजेता बनेको अर्को दिन पेजले उनका साथी सार्लेट र बेकीलाई आक्रमण गर्दै गरेकी थिइन् र उनले भनिन् कि सार्लेटले उनको बुवा नभएको भए उनी त्यहाँ हुने थिइनन्। पेजले सार्लेट र बेकीलाई आक्रमण गरेपछि उनीहरूको टोली छुट्टिएका थिए। अक्टोबर महिनामा पेजले पुन सार्लेट र बेकीसँग टोली गठन गर्ने झुटो जालसाजी गरिन् पेज उनीहरूसँग मिलेको जस्तै गर्दै उनीहरूलाई पछाडिबाट आक्रमण गरेपछि उनहरूको टोली पूर्णतया विघटन भएको थियो। २ नोभेम्बर रको एक श्रृङ्खलामा पेजले बेकीलाई र अन्य दुई प्रतिद्वन्द्वीलाई हराउँदै सार्लेटको डिभास च्याम्पियनसिपका लागि पहिलो दावेदार बनेकी थिइन्। त्यस खेलको अर्को आयोजना गरिएको लिञ्च र पेजको खेलमा लिञ्चले पेजलाई हराउन सफल भएकी थिइन्।

३० नोभेम्बर डब्ल्युडब्ल्युई रको एक श्रृङ्खलामा सार्लेटको सामना बेकी लिञ्चसँग भएको थियो र उक्त खेलमा सार्लेटको बुवा रिक फ्लेयरले बेकीलाई झुक्काएका कारण सार्लेटले उनलाई पछाडिबाट आक्रमण गर्दै लिञ्चलाई हराएकी थिइन्। डिसेम्बर महिना भरि सार्लेट र बेकीको तनाव झनझन उच्च हुँदै गएको थियो र ४ जनवरी २०१६ मा आयोजना गरिएको एक खेलमा लिञ्चले सार्लेटलाई हराएपछि सार्लेटले लिञ्चलाई पछाडिबाट आक्रमण गरेकी थिइन्। उक्त खेलको तीन दिन पछि बेकीले सार्लेटको डिभास च्याम्पियनसिपका लागि खेल रोयल रम्बल पे-पर-भ्युमा खेल्न पाएकी थिइन् तर उक्त खेलमा पनि सार्लेटको बुवा रिक फ्लेयरले बेकीलाई झुक्याका कारण सार्लेटले उनलाई पछाडिबाट आक्रमण गर्दै लिञ्चलाई पुन हराएकी थिइन्। फेब्रुअरी २०१६ मा आयोजित एक उपाधि रहित खेलमा ब्रि बेलाले सार्लेटलाई हराएकी थिइन् जसका कारण बेलाले फाष्टलेन पे-पर-भ्युमा डिभास च्याम्पियनसिपका लागि एक खेल प्राप्त गरेकी थिइन्। फाष्टलेनमा सार्लेटले ब्रि बेलालाई हराउँदै डिभास च्याम्पियनसिप आफुसँगै कायम गरेकी थिइन्। उक्त खेलको केही हप्ता पछि रोडब्लकमा सार्लेटको सामना नेटालियासँग भएको थियो भने उक्त खेलमा पनि सार्लेटले जित हासिल गरेकी थिइन्। मार्च महिनामा आयोजित डिभास च्याम्पियनसिपका लागि पहिलो दावेदार बन्नका लागि रको एक श्रृङ्खलामा लिञ्च र बेङ्क्सको खेल निर्धारित गरिएको थियो तर उक्त खेलमा कोहीपछि विजेता बन्न असमर्थ बने। त्यस र पछि आउने स्म्याकडाउनमा उनीहरूको पुन खेल जारी गरिएको थियो तर तात्कालिक डिभास विजेता सार्लेटले दुवैको जनालाई आक्रमण गरेपछि खेलमा कोहीपछि विजेता बन्न सकेनन्। खेलमा कोहीपनि विजेता नबने पछि आउँदै रेसलमेनिया डिभास विजेता सार्लेटले उनको च्याम्पियनसिप दुवै लिञ्च र बेङ्क्ससँग दाउमा लगाउन पर्ने भएको थियो। रेसलमेनिया ३२ मा पनि सार्लेटले दुवै बेङ्क्स र लिञ्चलाई हराउँदै नयाँ डब्ल्युडब्ल्युई महिला (डिभास च्याम्पियनसिपलाई महिला च्याम्पियनसिपमा परिणत गरिएको थियो) विजेता बन्न सफल बनेकी थिइन्।

र महिला विजेता (सन् २०१६–२०१७)

अप्रिल २०१६ मा फ्लेयर तात्कालिक महिला उपाधिका साथ

रेसरमेनिया ३२ पछि सार्लेटको नेटालियासँग द्वन्द्व भएको थियो भने ११ अप्रिल २०१६ रको एक श्रृङ्खलामा सार्लेटको सामना नेटालियाको विरुद्धमा महिला च्याम्पियनसिपका लागि जारी गरिएको थियो। उक्त खेलमा सार्लेटले नेटालियालाई सफलतापूर्वक हराउँदै महिला उपाधि आफुसँगै कायम राखेकी थिइन्। २ मे २०१६ मा उनीहरूको पुन महिला च्याम्पियनसिपका लागि जारी गरिएको थियो तर उक्त खेलमा खेलमा निर्णय चार्लस रोबिनसनले खेल नसकिदै सार्लेटलाई विजेता बनाएका थिए। खेलको समाप्ति पछि नेटालिया र उनका काकाले सार्लेट र उनको बुबा रिक फ्लेयरलाई आक्रमण गरेका थिए। २२ मे २०१६ मा आयोजित एक्सट्रिम रुल पे-पर-भ्युमा रिक फ्लेयरलाई रिङको छेउमा आउन प्रतिबन्ध लगाइएको थियो तर उक्त खेलमा डेना ब्रुकले फ्लेयरको पोशाक लगाउँदै पर्दामा देखिएपछि उक्त मौकाको फाइदा उठाउँदै सार्लेटले निटालियालाई हराउन सफल भएकी थिइन्। उक्त खेलको अर्को दिन आयोजित रको एक श्रृङ्खलामा सार्लेटले उनको बुबालाई आफ्नो पक्ष नलिन आग्रह गर्दै उनलाई सारा खेल दर्शकको सामु लज्जित पारेकी जसका कारण रिक फ्लेयर रिङबाट रुँदै गएका थिए र त्यसपछि सार्लेट र ब्रुकले एक टोलीको रूपमा काम गर्न सुरु गरेका थिए। जुन १९ मा आयोजित मनि इन द बेङ्क पे-पर-भ्युमा सार्लेट र ब्रुकको सामना नेटालिया र बिकी लिञ्चसँग भएको थियो भने उक्त खेलमा ब्रुक र सार्लेटले जित हासिल गरेका थिए। जुन २० रको एक श्रृङ्खलामा सार्लेटले उनको महिला च्याम्पियनसिपका लागि पेज मैदान उत्रिएकी थिइन् तर उक्त खेलमा ब्रुकले अवरोध पुर्‍याएका कारण सार्लेटले पेजलाई हराएकी थिइन् र खेलको समाप्ति पछि दुवै सार्लेट र ब्रुकले पेजलाई आक्रमण गरका थिए भने पेजलाई आक्रमणबाट बचाउन सासा बेङ्क्स आएकी थिइन्। त्यसपछिको हप्ता बेङ्क्स र पेजको सामना ब्रुक र सार्लेटको विरुद्धमा भएको थियो जहाँ पेज र बेङ्क्सले जित हासिल गरेका थिए। जुलाई २४ मा आयोजित ब्याटलग्राउण्ड पे-पर-भ्युमा बेङ्क्स र एनएक्सटीबाट मुख्य कार्यसूचीमा पर्दापण गरेकी बेइलीले सार्लेट र ब्रुकलाई एक ट्याग टिम खेलमा हराएका थिए।

सन् २०२६ जुलाई १९ मा आयोजना गरिएको डब्ल्युडब्ल्युई ड्राफ्टमा सार्लेट रसँग आवद्ध भएकी थिइन्। सार्लेट रसँग आवद्ध भएपछि उनले २५ जुलाई २०१६ रको एक श्रृङ्खलामा उनको उक्त ब्रान्डमा पहिलो खेल खेलेकी थिइन् जहाँ उनले आफ्नो महिला उपाधि सासा बेङ्क्ससँग हार्न पुगेकी थिइन्। अगस्ट २१ मा आयोजित समरस्ल्याम पे-पर-भ्युमा सार्लेट र बेङ्क्सको पुन उपाधिका लागि खेल जारी गरिएको थियो जहाँ सार्लेटले बेङ्क्सलाई हराउँदै दोस्रोपटक महिला विजेता बन्न सफल भएकी थिइन् र त्यसपछि उक्त उपाधिको नाम डब्ल्युडब्ल्युई र महिला च्याम्पियनसिप राखिएको थियो जसका कारण स्म्याकडाउनमा पनि स्म्याकडाउन महिला च्याम्पियनसिप उपाधि भित्र्याइएको थियो। क्लास अफ च्याम्पियन्स पे-पर-भ्युमा बेइली, बेङ्क्स र सार्लेटको खेल महिला च्याम्पियनसिपका लागि जारी गरिएको थियो तर उक्त खेलमा सार्लेटले दुवै बेङ्क्स र बेइलीलाई हराउन सफल भएकी थिइन्। त्यसपछि बेङ्क्सलाई तात्कालिक सामान्य प्रबन्धक मिक फोलिले उनलाई उपाधिका लागि एक खेल खेल्न पाउने मौका दिएपछि ३ अक्टोबर २०१६ मा आयोजित रको एक श्रृङ्खलामा बेङ्क्सले सार्लेटलाई हराउँदै दोस्रोपटक उपाधि हात पार्न सफल भएकी थिइन्। त्यसपछि सार्लेटले कुस्तीमा रिङ नाम सार्लेटबाट सार्लेट फ्लेयर राखेकी थिइन्।

बेङ्क्स महिला विजेता बनेपछि उनले पुन सार्लेटलाई हेल इन अ सेल खेलका लागि खेल्न चुनौती दिएकी थिइन् भने उक्त चुनौती सार्लेटले स्वीकार गरेपछि अन्ततः उनीहरूको खेल हेल इन अ सेल भित्र जारी गरिएको थियो। ३० अक्टोबर २०१६ मा आयोजित उक्त कार्यक्रममा सार्लेटले बेङ्क्सलाई हराउँदै तेस्रोपटक महिला विजेता बन्न सफल भएकी थिइन्। २० नोभेम्बर २०१६ मा आयोजना गरिएको परम्परागत सरभाइभर सिरिजमा सार्लेट फ्लेयर रको प्रतिनिधित्व गर्दै टोलीको कप्तानको रूपमा घोषित भएकी थिइन्। उक्त कार्यक्रममा अन्तिममा रले खेल जितेको थियो भने अन्तिम फ्लेयर बेइली बाँकी रहन सफल भएका थिए। २८ नोभेम्बर रको एक श्रृङ्खलामा बेङ्क्सले उनले गुमाएको महिला उपाधिका लागि सार्लेटको विरुद्धमा पुन खेल माग गरेकी थिइन् भने अर्को हप्ता रको एक श्रृङ्खलामा आयोजना गरिएको फल्स काउन्ट एनिवेर खेलमा बेङ्क्सले सार्लेटलाई हराउँदै उनको व्यक्तिगत तेस्रो उपाधि हात पारेकी थिइन्। उनी महिला विजेता बनेपछि आउँदै रोडब्लक पे-पर-भ्युमा उनको खेल सार्लेटको विरुद्धमा हुने निर्णय भएको थियो। रोडब्लकमा सार्लेट र बेङ्क्सको ३० मिनेट आइरन म्यान खेलमा २ को विरुद्ध २ भएपछि थप समयमा सार्लेटले बेङ्क्सलाई हराउँदै चौँथोपटक महिला विजेता बन्न सफल भएकी थिइन्। उनी महिला विजेता बनेपछि सार्लेटको बेइलीसँग द्वन्द्व चर्किएको थियो भने बेइलीलाई दुई फरकफरक खेलहरूमा सार्लेटलाई हराएकी थिइन्। उनीहरू बीच तनाव उच्च भएका कारण २९ जनवरी २०१७ का दिन आयोजित रोयल रम्बल पे-पर-भ्युमा सार्लेट र बेइलीको खेल महिला उपाधिका लागि जारी गरिएको थियो भने उक्त खेलमा सार्लेटले सफलतापूर्वक बेइलीलाई हराएकी थिइन्।

१३ फेब्रुअरीका रको एक श्रृङ्खलामा बेइलीले फ्लेयरलाई हराउँदै पहिलोपटक महिला च्याम्पियनसिप जितेकी थिइन्। फाष्टलेन पे-पर-भ्युमा बेइली र फ्लेयरको बीच खेल भएको थियो तर उक्त खेलमा बेङ्क्सको हस्तक्षेपका कारण बेइलीले फ्लेयरलाई हराउँदै फ्लेयरको पे-पर-भ्युमा अपराजित कीर्तिमान तोडिएको थियो। त्यसपछि फ्लेयरले उनी र डेना ब्रुकको सम्बन्ध पनि तेडेकी थिइन् र फ्लेयरले ब्रुकलाई एकल खेलमा हराएकी थिइन्। रेसलमेनिया ३३ मा बेइलीले उनको पहिलो रेसलमेनिया खेल खेलेकी थिइन् जहाँ उनले फ्लेयर, बेङ्क्स र ज्याक्सलाई फेटल फोर-वे इलिमिनेसन खेलमा हराएकी थिइन्। १० अप्रिल २०१७ रको एक श्रृङ्खलामा फ्लेयरले रका लागि अन्तिम खेल खेलेकी थिइन् जहाँ उनी नाया ज्याक्ससँग पराजित भएकी थिइन्।

स्म्याकडाउन महिला विजेता (सन् २०१७–२०१८)

११ अप्रिल २०१७ मा फ्लेयर सुपरस्टार सेक अप अन्तर्गत रबाट स्म्याकडाउनमा सरुवा भएकी थिइन्। उनी स्म्याकडाउनमा सरुवा भएको अर्को हप्ता उनले तात्कालिक स्म्याकडाउन महिला विजेता नेयोमीलाई एक उपाधि रहित खेलमा पराजित गरेकी थिइन्। फ्लेयरले महिला विजेतालाई हराएपछि उनले उपाधिका लागि खेल प्राप्त गरेकी थिइन् तर उक्त खेलको बीचमा द वेलकमिङ कमिटी (नेटालिया, कार्मेला र टमिना)ले अवरोध पुर्‍याएका कारण खेल स्थगित गरिएको थियो। त्यसपछि दुवै र र स्म्याकडाउनका पे-पर-भ्युहरूमा खेल खेल्ने डब्ल्युडब्ल्युईको इतिहासमै उनी पहिलो महिला खेलाडी बनिन्। सन् २०१७ मेमा फ्लेयरले नेयोमी र लिञ्चसँग साझेदारी गर्दै द वेलकमीङ कमिटी (नेटालिया, कारमेला र टमिना) विरुद्धमा उत्रिए। उक्त दुई टोलीको खेल ब्याकलास पे-पर-भ्युमा आयोजित गरिएको थियो भने उक्त खेलमा द वेलकमीङ कमिटीले लिञ्च, नेयोमी र सर्लेटलाई हराएका थिए जब लिञ्चले निटालियाको सार्पसुटरमा आत्मसमर्पण गरिन्। त्यस खेलपछि केही महिना पछि आयोजना गरिएको पहिलो महिला मनि इन द बेङ्कमा फ्लेयरले भाग लिएकी थिइन् तर उक्त खेलमा कारमेलाको जित भएसँगै उनी पहिलो महिला मनि इन द बेङ्क विजेता बनेकी थिइन्। जुलाई २३ मा आयोजित ब्याटलग्रउण्ड पे-पर-भ्युमा फ्लेयरले पाँच महिला इलिमिनेसन खेलमा सहभागी भएकी थिइन् भने उक्त खेलको विजेताले महिला उपाधिका लागि खेल खेल्न पाउने प्राबधान रहेको थियो। उक्त खेलको अन्तिममा उनलाई नेटालियाले खेलबाट निस्कासन गराएकी थिइन्।

फ्लेयर स्म्याकडाउन महिला विजेताको रूपमा

सार्लेटको बुबाको स्वास्थ्य अवस्था गम्भीर भएका कारण सार्लेटले दुई महिनाको अवकाश लिएकी थिइन् र उनी १९ सेप्टेम्बर २०१७ स्म्याकडाउनको एक श्रृङ्खलामा फर्किएकी थिइन्। उनी रिङमा फर्किएपछि उनले समस्त डब्ल्युडब्ल्युईका समर्थक र दर्शकहरूलाई उनको बुबाको स्वास्थ्य प्रति गम्भीर भएका कारण उनीहरूलाई धन्यवाद दिएकी थिइन्। सोही रात फ्लेयरले महिला च्याम्पियनसिपका लागि पहिलो दावेदार बन्नका लागि फेटल फोर वे खेल खेलेकी थिइन् जहाँ उनले जित हासिल गर्दै दावेदार बनेकी थिइन्। ८ अक्टोबर २०१७ मा आयोजित हेल इन अ सेलमा सार्लेटको सामना तात्कालिक स्म्याकडाउन महिला विजेता नेटालियासँग भएको थियो तर उक्त खेलमा नेटालियाले फ्लेयरलाई स्टिलको कुर्सीले आक्रमण गरेपछि खेल स्थगित गरिएको थियो। उक्त खेलमा सार्लेटको जित भएको थियो उपाधि भने जित्न असमर्थ बनिन्। त्यसपछि फ्लेयरले पुन खेल माग गरेकी थिइन् र १४ नोभेम्बर २०१७ मा फ्लेयरको गृह सहरमा खेल आयोजना गरिएको थियो जहाँ सार्लेटले नेटालियालाई हराउँदै पहिलोपटक स्म्याकडाउन महिला विजेता बन्न सफल भएकी थिइन्। उनले स्म्याकडाउन महिला उपाधि जितेपछि उनी डिभास च्याम्पियनसिप, एनएक्सटी महिला च्याम्पियनसिप, र महिला च्याम्पियनसिप र स्म्याकडाउन महिला च्याम्पियनसिप जित्ने डब्ल्युडब्ल्युईको इतिहासमै पहिलो महिला खेलाडी बन्न सफल भएकी थिइन्। नेटालियालाई हराउँदै महिला विजेता बनेपछि परम्परागत सरभाइभर सिरिजमा फ्लेयरले निटालियाको साट्टामा अलेक्सा ब्लिससँग १९ नोभेम्बर सरभाइभर सिरिज पे-पर-भ्युमा समना गरेकी थिइन् जहाँ फ्लेयरले ब्लिसलाई हराएकी थिइन्। उक्त खेलको एक महिना पछि १७ डिसेम्बर २०१७ मा आयोजित क्लास अफ च्याम्पिय्स पे-पर-भ्युमा फ्लेयरको सामना उनको उपाधिका लागि नेटालियासँग एक लम्बरज्याक खेलमा आयोजना गरिएको थियो जहाँ फ्लेयरले नेटालियालाई पराजित गरिन्।

सन् २०१७ को समाप्तिमा फ्लेयरले एकपटक पुन बेकी लिञ्च र नेयोमीसँग साझेदारी गर्दै एनएक्सटीबाट मुख्य कार्यसूचीमा पर्दापण गरेका द राएट स्क्वाड (रुबी राएट, साराह लोगन र लिभ मोर्गेन) विरुद्धमा उत्रिएका थिए। ११ मार्च २०१८ मा आयोजित फास्टलेनमा, राएटले सार्लेट फ्लेयरको स्म्याकडाउन महिला उपाधिको लागि खेल्न पाउने अवसर प्राप्त गरेकी थिइन् भने उक्त खेलमा सार्लेटले राएटलाई सफलतापूर्वक हराएकी थिइन्। उक्त खेलको समाप्ति पछि पहिलो महिला रोयल रम्बलकी विजेता अस्काले फ्लेयरलाई रेसलमेनियाका लागि चुनौती दिएकी थिइन् भने रेसलमेनियामा ३४ मा आयोजित अस्का र फ्लेयरको महिला उपाधिका लागि खेलमा सार्लेटले अस्कालाई हराउँदै उनको ९१४ दिन सम्मको अपराजित यात्रा टोड्न सफल भएकी थिइन्। १० अप्रिल २०१८ स्म्याकडाउनको एक श्रृङ्खलामा पिटन रोइस र बिली केले पहिलोपटक डब्ल्युडब्ल्युईको मुख्य कार्यसूचीमा पर्दापण गरेका थिए। उनीहरूले स्म्याकडाउनमा पर्दापण गर्ने बित्तिकै उनीहरूले सार्लेट फ्लेयरलाई रिङमा आक्रमण गरेका थिए जसको फाइदा उठाउँदै कारमेलाले मनि इन द बेङ्क क्यास इन गर्दै स्म्याकडाउन महिला विजेता बनेकी थिइन्। फ्लेयरले ६ मे २०१८ का दिन कार्मेलाको विरुद्धमा उपाधिका लागि खेल प्राप्त गरेकी थिइन् तर उक्त खेलमा उनले उपाधि जित्न असमर्थ बनिन्। जुन २०१८ मा आयोजित महिला मनि इन द बेङ्कमा फ्लेयरले भाग जनाएकी थिइन् तर उक्त खेल अलेक्सा ब्लिसले जितेकी थिइन्।

बेकी लिञ्चसँग दुश्मनी (सन् २०१८–हाल)

केही क्षणको अवकाश पछि फ्लेयर ३१ जुलाई २०१८ स्म्याकडाउन लाइभको एक श्रृङ्खलामा फर्किएकी थिइन् र उनले आफ्नो साथी बेकी लिञ्चलाई कार्मेलाले आक्रमण गर्न लाग्दा बचाएकी थिइन् र सोही दिन सार्लेटले कार्मेलालाई हराउँदै आउँदै समरस्ल्याममा हुने लागेको महिला उपाधिको खेलमा भाग लिने मौका पाएकी थिइन्। समरस्ल्याममा आयोजित महिला च्याम्पियनसिपका लागि लिञ्च, फ्लेयर र कार्मेलाको बीच खेल भएको थियो भने उक्त खेलमा सार्लेटले स्म्याकडाउन महिला च्याम्पियनसिप जित्दै डब्ल्युडब्ल्युईको इतिहासमै सातवटा उपाधि जित्नै दोस्रो महिला खेलाडी बनेकी थिइन्। खेल सकिएको‍ केही छिन् पछि लिञ्चले नयाँ स्म्याकडाउन महिला विजेता सार्लेटलाई आक्रमण गरेकी थिइन् जुन उनको पहिलोपटक थियो। त्यस पछिका श्रृङ्खलाका लिञ्च र तात्कालिक महिला विजेता सार्लेट बीच तनाव उच्च बड्दै गएको थियो भने उनीहरूको एक अर्काको खेलमा आई खेलमा बाधा पुर्‍याउँदै एक आर्कालाई आक्रमण गर्न थालेका थिए। तनाव उच्च भएका कारण फ्लेयर र लिञ्चको खेल हेल इन अ सेल पे-पर-भ्युमा आयोजन गरिएको थियो जहाँ लिञ्चले फ्लेयरलाई हराएसँगै सार्लेटले उपाधि गुमाउनु परेको थियो। लिञ्च स्म्याकडाउन महिला विजेता बनेपछि अक्टोबर महिनामा लिञ्चले अष्ट्रेलियामा आयोजना गरिएको सुपर सो डाउन कार्यक्रममा उक्त च्याम्पियनसिप फ्लेयरको विरुद्धमा राखेकी थिइन् तर उक्त खेल विवादास्पद रूपमा समाप्ति भएको थियो।उक्त खेलमा कोहीपनि विजेता नबनेपछि इभोलुसन पे-पर-भ्युमा दुई महिला बीच लाष्ट विमेन स्ट्याण्डिङ म्याच भएको थियो जहाँ लिञ्चले फ्लेयरलाई माथिल्लो डोरीबाट तल रहेको एक टेबुलमा पावरबम हानेपछि लिञ्चले खेल जितेकी थिइन्।

सन् २०१८ नोभेम्बरमा आयोजना गर्न लागिएको परम्परागत सरभाइभर सिरिजमा तात्कालिक स्म्याकडाउन महिला विजेता बेकी लिञ्चले सार्लेट फ्लेयरलाई आफ्नो सट्टामा रोण्डा राउजीको विरुद्धमा खेल खेल्ने मौका पाएकी थिइन् भने उक्त खेलमा सार्लेटले राउजीलाई स्टिलको कुर्सी र केण्डो लौरोले प्रहार गरेका कारण खेलको विजेता ,राउजी बनेकी थिइन्। त्यसपछिको अर्को महिना आयोजित टिएलसीमा बिकी लिञ्चको सामना सार्लेट फ्लेयर र अस्काको विरुद्धमा भएको थियो भने उक्त खेलमा राउजीले फ्लेयर र लिञ्च चढेको सिढीलाई धकालिदिएकी थिइन् जसको फाइदा उठाउँदै अस्काले स्म्याकडाउन महिला च्याम्पियनसिप पहिलोपटक हात पार्न सफल भएकी थिइन्। २७ जनवरी २०१९ का दिन आयोजित रोयल रम्बलमा सार्लेटले भाग लिएकी थिइन् जहाँ उनी ५० मिनेट १ सेकेण्ड सम्म रहेकी थिइन् भने उनलाई अन्तिममा बेकी लिञ्चले निस्कासन गराएकी थिइन्। रोण्डा राउजीसँग द्वन्द्व चलेपछि रको एक श्रृङ्खलामा लिञ्चलाई डब्ल्युडब्ल्युईकी कार्यकारी स्टेफिनी म्याकमेनले चिकित्सकलाई खुट्टा जाँच गर्न लगाउ भन्ने कुरा लिञ्चले अस्वीकार गरेपछि लिञ्चलाई ६० दिनका लागि डब्ल्युडब्ल्युईबाट निलम्बन गरिएको थियो र उनको सट्टामा सार्लेट फ्लेयरलाई राउजीसँग रेसलमेनियामा खेल खेल्न दिइने घोषण डब्ल्युडब्ल्युईका संस्थापक भिन्स म्याकमेनले गरेका थिए।

सन् २०१९ मार्च महिनामा लिञ्च र फ्लेयरको खेल फाष्टलेन पे-पर-भ्युमा आयोजना गरिएको थियो भने उक्त खेलको बीचमा राउनीले हस्तक्षेप गर्दै लिञ्चलाई आक्रमण गरेका कारण लिञ्चले खेल जित्दै आउँदै रेसलमेनिया ३५ मा हुने राउजी र फ्लेयरको खेलमा समावेश हुने मौका पाएकी थिइन्। रेसलमेनिया आउनु भन्दा केही दिन अघि फ्लेयरले तात्कालिक स्म्याकडाउन महिला विजेता अस्कालाई हराउँदै तेस्रोपटक स्म्याकडाउन महिला विजेता बन्न सफल भएकी थिइन्। रेसलमेनिया ३५ मा आयोजित फ्लेयर, राउजी र लिञ्चको खेलको विजेताले दुवै स्म्याकडाउन र र महिला उपाधि जित्ने प्राबधान रहेको थियो भने उक्त खेल कार्यक्रमको अन्तिममा आयोजना गरिएको थियो। उक्त कार्यक्रममा लिञ्चले राउजी र फ्लेयर दुवैलाई हराउँदै डब्ल्युडब्ल्युईको इतिहासमै दुवै महिला उपाधि जित्ने पहिलो महिला खेलाडी बनेकी थिइन्। रेसलमेनिया पछि फ्लेयरले लिञ्चसँगको द्वन्द्वलाई निरन्तरता दिँदै बेइलीलाई एक खेलमा हराउँदै आउँदै मनि इन द बेङ्क पे-पर-भ्युमा स्म्याकडाउन महिला च्याम्पियनसिपका लागि लिञ्च विरुद्ध खेल प्राप्त गरेकी छिन्।

अन्य सञ्चार माध्यमहरू

६ डिसेम्बर २००४ उत्तरी क्यारोलिनामा आयोजित रको एक श्रृङ्खलामा ट्रिस स्ट्राटस र लिटाको खेल महिला च्याम्पियनसिपका लागि जारी गरिएको थियो जहाँ सार्लेट रिङको छेउमा बसेकी थिइन् जुन खेल उक्त रको श्रृङ्खलाको मुख्य खेल रहेको थियो। उक्त खेलको १२ वर्षपछि २५ जुलाई २०१६ मा पनि सार्लेट र उनको प्रतिद्वन्द्वी सासा बेङ्क्सको खेल महिला च्याम्पियनसिपका लागि जारी गरिएको थियो जुन उक्त रको श्रृङ्खलाको प्रमुख खेल रहेको थियो।

सार्लेट डब्ल्युडब्ल्युई २के१७ मा एक खेल्न मिल्ने चरित्रको रूपमा पर्दापर्ण गरेकी थिइन् र उनी पछि डब्ल्युडब्ल्युई २के१८ र डब्ल्युडब्ल्युई २के१९ मा पनि देखा परेकी छिन्।

व्यक्तिगत जीवन

सार्लेट फ्लेयरले मे २०१० मा रिकी जोनसनसँग विवहा गरेकी थिइन् भने उनीहरू पारपाचुके फेब्रुअरी २०१३ मा भएको थियो। सार्लेटले सेकेण्ड नेचर नामक एक पुस्तक आफ्नो बुबाको सहकार्यमा लेखेकी थिइन् जहाँ उनलाई ज‍ोनसनले दुरव्यावहार गरेका कारण उनलाई छाडेको कुरा उल्लेख गरेकी थिइन्। सन् २०१३ मा फ्लेयरले दोस्रोपटक थोमस लिटमरसँग (रिङ नाम ब्राम) विवहा गरेकी थिइन् भने २९ अक्टोबर २०१५ का दिन फ्लोरिडामा उनीहरूको पारपाचुके भएको थियो।

चलचित्रहरू

वर्ष	शीर्षक	भूमिका	कैफियत
२०१७	साइक: द मुभी	हिथर रकरिएर	टेलिभिजन चलचित्र

उपाधि र उपलब्धिहरू

सार्लेट फ्लेयरले डब्ल्युडब्ल्युईको मुख्य कार्यसूचीमा पर्दापण गरेपछि ८ वटा महिला उपाधिहरू जितेकी छन् जसमा उनी एक पटक डिभास विजेता (बायाँ),४ पटक र महिला विजेता (बिचको) र ३ पटक स्म्याकडाउन महिला विजेता (दायाँ) बन्न सफल भएकी छिन्।

• सिबिएस स्पोर्ट्स
  • डब्ल्युडब्ल्युई वर्षको उत्कृष्ट खेल (सन् २०१८) सन् २०१८ को टिएलसीमा बेकी लिञ्च र आस्काको विरुद्धमा
• प्रो रेस्लिङ इलुष्ट्रेटेड
  • वर्षको दुश्मनी (सन् २०१६) सासा बेङ्क्स विरुद्ध
  • वर्षको उत्कृष्ट महिला खेलाडी (सन् ३०१६)
  • पिडब्ल्यूआई महिला ५० (सन् २०१६)
• स्पोर्ट्स इलुष्ट्रेटेड
  • सन् २०१८ का उत्कृष्ट महिला कुस्ती खेलाडी अन्तर्गत शीर्ष २ मा पर्न सफल
• रेस्लिङ अबजर्भर न्युजलेटर
  • वर्षको दुश्मनी (सन् २०१५) टिम पिसिबी विरुद्ध टिम ब्याड विरुद्ध टिम बेला
• डब्ल्युडब्ल्युई
  • एनएक्सटी महिला विजेता (१ पटक)
  • डब्ल्युडब्ल्युई डिभास च्याम्पियनसिप (१ पटक)
  • डब्ल्युडब्ल्युई र महिला विजेता (सार्लेट डब्ल्युडब्ल्युईकी पहिलो महिला विजेता हुन्।) (४ पटक)
  • डब्ल्युडब्ल्युई स्म्याकडाउन महिला विजेता (४ पटक)

बाह्य सुत्रहरू

• इन्टरनेट चलचित्र डेटाबेसमा सार्लेट फ्लेयर