उपेन्द्र महतो

उपेन्द्र महतो Upendra Mahato
जन्म	सन् १९६० बुटवल, नेपाल
वासस्थान	मस्को, रसिया
राष्ट्रियता	नेपाली
जातीयता	मैथिल
मातृ शिक्षाप्रतिष्ठान	विद्यावारिधि
पेशा	उद्योगपति
चिनारीको कारण	गैर आवासीय नेपाली सङ्घका संस्थापक अध्यक्ष
धर्म	हिन्दू
सन्तान	२
मातापिता	रामआशिष महतो (बुवा) फूलकुमारी महतो (आमा)

उपेन्द्र महतो (अङ्ग्रेजी: Upendra Mahato, जन्म; १९६०) नेपाली उद्योगपति हुन् जो मुख्यतया रसिया र नेपालमा बसोबास गर्छन् । रसियामा उनी रसिया-नेपाल उद्योग व्यवसाय सङ्घका अध्यक्ष हुन् । उनी गैर आवासीय नेपाली सङ्घका संस्थापक अध्यक्ष हुन् । उनले सन् २००३ देखि सन् २००९ सम्म यस सङ्घको अध्यक्ष भएर कार्यभार सम्भालेका थिए । सन् १९९० देखि व्यवसायमा हात हालेका उपेन्द्रको रसियामा इलेक्ट्रोनिक्स, तेल, भवन निर्माण, बैङ्क तथा मेसिनहरूको कारोवार रहेको छ । रसियामा इलेक्ट्रोनिक्स कारोवारीको रूपमा व्यवसाय आरम्भ गरेका महतोको रसियाको राजधानी मस्कोबाट ४०० किलोमिटर दक्षिणमा रहेको भोरोनेझमा टेलिभिजन उद्योग रहेको छ जहाँबाट प्रत्येक वर्ष १० लाख टेलिभिजन बन्ने गर्छ । यस वाहेक उनको गोर्भुस्कामा एउटा मेगा इलेक्ट्रोनिक्स बजार रहेको छ जहाँबाट प्रत्येक दिन ८०,००० ग्राहक भ्रमण गर्ने गर्छन । उनको मस्कोको महत्त्वपूर्ण आवाशीय भागमा ५० मिलियनको लागत बताइएको २६ तल्ले भवन रहेको छ ।

युरोप, अफ्रिका, एसिया लगायत नेपालमा पनि उनको विभिन्न क्षेत्रमा लगानी रहेको छ । नेपालको प्रमुख टेलिकम कम्पनी एनसेलमा उनको २०% शेयर रहेको छ । एनसेलको पुरानो नाम मेरो मोबाइल (स्पाइस नेपाल प्राइभेट लिमिटेड)मा उनकै नेतृत्वमा सञ्चालनमा आएको थियो । सन् २०१६ नोभेम्बरमा उनले भारतको प्रसिद्ध आयुर्वेद कम्पनी पतञ्जली आयुर्वेदलाई नेपाल भित्राउन सफल भएका छन् । पतञ्जली आयुर्वेद उद्योग प्राइभेट लिमिटेड, नेपालमा उपेन्द्र महतो र पतञ्जली योगपीठको संयुक्त लगानी रहेको छ ।

जीवनी

उपेन्द्र महतोको जन्म नेपालको पूर्वी तराई सिरहाको कर्जन्हामा एक सामान्य परिवारमा भएको हो । उनको बुवाको नाम रामआशिष महतो र आमाको नाम फूलकुमारी महतो हो । उनले आफ्नो प्रारम्भिक शिक्षा सिराहाकै सरकारी विद्यालयमा गरेका थिए । इन्जिनियरिङको शिक्षा प्राप्त गर्न उनी काठमाडौंको इन्जिनियरिङ कलेज पुल्चोक क्याम्पसमा भर्ना भए । प्राविधिक क्षेत्रमा डाक्टर अफ साइन्सको पढाई गर्न रसिया तर्फ लागे र त्यहाँ उनले सो शिक्षा प्राप्त गरे ।

व्यवसाय

रसियामा डाक्टर अफ साइन्सको शिक्षा प्राप्त गरेपछि उनले रसियालाई नै प्राथमिकतामा राखेर आफ्नो इलेक्ट्रोनिक्सको व्यवासय सञ्चालन गरे । सन् १९९१ मा सोभियत सङ्घको विघटन भएपछि रसियामा विदेशीले पनि लगानी गर्न अवसर पायो यहि मौकामा उनले आफ्नो इलेक्ट्रोनिक्सको व्यवसायको जग रसियामा बसाले र सो व्यवसाय चम्केपछि उनले त्यहाँ विभिन्न क्षेत्रमा लगानी गरेर धन आर्जित गर्न सफल भए ।

उपेन्द्र महतो बेलारुसमा नेपालका अवैतनिक महावाणिज्यदूत हुनुहुन्छ।