टीकापुर

टीकापुर
नगरपालिका
टीकापुर उद्यान
टीकापुर नक्सामा टीकापुरको अवस्थिति टीकापुर टीकापुर (नेपाल)
निर्देशाङ्क: २८°३१′३०″उ॰ ८१°०७′१५″पू॰
देश	नेपाल
प्रदेश	सुदूरपश्चिम प्रदेश
जिल्ला	कैलाली जिल्ला
नगरपालिका	वि.सं. २०५३ माघ ११
समावेश (गाविस)	टीकापुर
सम्मिलित (मिति)	वि.सं. २०५३ माघ ११
समावेश (गाविस)	आंशिक रूपमा नारायणपुर र धनसिंहपुर
सम्मिलित (मिति)	वि.सं. २०७३ फाल्गुन २२
सरकार
• मेयर	तपेन्द्र बहादुर रावल
• उप मेयर	केशरी कुमारी रावल बिष्ट
क्षेत्रफल
• जम्मा	११८.३३ किमी२ (४५.६९ वर्ग माइल)
जनसङ्ख्या  (वि.सं. २०६८)
• जम्मा	७६,०८४
• घनत्व	६४०/किमी२ (१,७००/वर्ग माइल)
समय क्षेत्र	युटिसी+५:४५ (नेपाली समय)
क्षेत्रीय सङ्केत(हरू)	०९१
वेबसाइट	tikapurmun.gov.np

टीकापुर नगरपालिका नेपालको सुदूरपश्चिम प्रदेशमा पर्ने कैलाली जिल्लाको एक नगरपालिका हो। कैलाली जिल्लाको तत्कालिन टीकापुर गाउँ विकास समितिका सम्पूर्ण वडालाई वि.सं. २०५३ माघ ११ गते टीकापुर नगरपालिका घोषणा गरिएको थियो। नेपालमा सङ्घीय शासन व्यवस्था लागू भएपछि स्थानीय तहको गठन भएसँगै वि.सं. २०७३ फाल्गुन २२ मा आंशिक रूपमा नारायणपुर र धनसिंहपुर गाविसका केही वडाहरूलाई यसमा गाभेर यो नगरपालिकाको क्षेत्र विस्तार गरिएको थियो। कुल ९ वडामा विभाजित यो नगरपालिकाको जनसङ्ख्या वि.सं. २०६८ सालको जनगणना अनुसार ७६,०८४ रहेको छ। यो नगरपालिकालाई सुदूरपश्चिमको पूर्वी मूल गेट कर्णाली पुलबाट १३ किलोमिटर पश्चिममा पर्ने लम्की, धनगढी, महेन्द्रनगर जस्ता प्रमुख सहरहरू जोड्ने उद्गम बिन्दु मान्ने गरिन्छ।नेपालको सबैभन्दा ठूलो मानव निर्मित उद्यान टीकापुर पार्क यसै नगरपालिकाभित्र रहेको छ।

नामकरण

घना जङ्गलले भरिभराउ रहेको यस क्षेत्रमा मानिसहरूको बस्ती बसाल्ने क्रममा यहाँका मानव बस्तीहरू टीका जस्तै गोलाकार रूपमा बसेकोले यस क्षेत्रको नाम टीकापुर रहन गएको भन्ने भनाइ छ। यस्तै अर्कों भनाइ अनुसार मानव बस्ती बसने क्रममा जङ्गल फडानीको कार्य दशैंको टीकाको दिनदेखि प्रारम्भ गरिएकोले यस ठाउँको नाम टीकापुर रहन गएको भन्ने भनाइ छ।

जनसङ्ख्या

नेपालको वि.सं. २०६८ को जनगणना अनुसार टीकापुर नगरपालिकाको जनसङ्ख्या ७६,०८४ रहेको छ।