मनोज गजुरेल

स्वतन्त्र विश्वकोश, नेपाली विकिपिडियाबाट
Jump to navigation Jump to search
मनोज गजुरेल
मनोज गजुरेल
जन्मसन् १९७४ जुलाई १०
ताप्लेजुङ, नेपाल
वासस्थानबालकोट, भक्तपुर
राष्ट्रियतानेपाल नेपाली
नागरिकतानेपाली
शिक्षास्नातक तह(पत्रकारिता)
पेशाहास्यव्यङ्ग्य कलाकार, लेखक, सामाजिक अभियन्ता, उत्प्रेरक
चिनारीको कारणहास्यव्यङ्ग्य कलाकार, लुखास्त, हनुम्यान, मगज र जोकशास्त्र हास्यव्यङ्ग्य निबन्ध
गृहनगरझापा
सन्तानमिरोज गजुरेल र मेमोरी गजुरेल
मातापितास्व. भवानीप्रसाद गजुरेल र माता इन्द्रमाया गजुरेल
वेबसाइटgajureal.com

मनोज गजुरेल नेपाली हास्यव्यङ्ग्य कलाकार हुन्।[१][२] हाउभाउसहितको व्यङ्ग्यकारको बादशाहका[३] रूपमा परिचित उनी स्वरको मात्र नक्कल गर्दैनन् कुनै पात्रको लगाइ, हिँडाइ, बोलाइ हाउभाउका साथै शारीरिक वनावटको समेत नक्कल गर्छन्। यतिसम्म कि धेरै दर्शक/श्रोताहरू सक्कली पात्र र नक्कली पात्र छुट्याउन नसकेर[४] हैरान[५] हुन्छन्। पूर्वराजा ज्ञानेन्द्र शाह[६]देखि पूर्वप्रधानमन्त्री पुष्पकमल दाहाल[७] साथै भारतीय प्रधानमन्त्री नरेन्द्र मोदी[८]देखि अमेरिकी राष्ट्रपति डोनाल्ड ट्रम्प[९]सम्मको नक्कल गर्दै उनले नेपालमा मात्र हैन अन्तरराष्ट्रिय जगतमा समेत वाहावाही[१०] पाएका छन्। अमेरिकी अनलाइन सीबिएस न्युजले[११] समेत उनलाई विश्वका १८ कमेडियनको सूचीमा[१२] राखेको छ। यसरी वाहवाही कमाउनमा उनी आफ्नो प्रस्तुतिमा हास्यव्यङ्ग्य मात्र हैन बौद्धिकतासमेत मिसाउछन्। यसैले उनलाई समग्रमा बौद्धिक हास्यकलाकारको[१३] रूपमा चिनिन्छ। उनको व्यङ्ग्यको तारो मुख्यतः सामाजिक तथा राजनैतिक बेथिति, कुरीति, कुसंस्कार, कुप्रथा आदि नै हुन्। उनी राजनीतिलाई विश्लेषणात्मक तरिकाले नकारात्मक पाटोलाई व्यङ्ग्य प्रहार गर्छन् भने सकारात्मक पाटोलाई उजागर गर्दै सही बाटोमा लाग्न उत्प्रेरित गर्छन्।[१४]

विद्यार्थी राजनीतिबाट कलाकारिता क्षेत्रमा प्रवेश गरेका[१५] मनोज गजुरेलको जन्म विक्रम सम्बत् २०३१ अषाढ २६ गते पिता स्व. भवानीप्रसाद गजुरेल र माता इन्द्रमाया गजुरेलको कोखबाट ताप्लेजुङ जिल्लाको मामाङ्खे गाउँमा कान्छो छोराको रूपमा भएको हो। उनको वास्तविक नाम मायानाथ गजुरेल हो।[१६] पत्रकारिता विषयमा स्नातक तह उत्तीर्ण गरेका उनी सिस्नुपानी नेपालका उपाध्यक्ष[१७], गजुरियल गार्डेन प्रा.लि. का अध्यक्ष[१८], गजुरियल डटकमका सम्पादक तथा माइडियर इभेन्ट्स एण्ड क्रिएसनका डाइरेक्टर हुन्। मूल्याङ्कन मासिकसँग आवद्ध पत्रकार गजुरेल वि.स्. २०५२ देखि इन्सेकसँग संबद्ध रहेर मानवअधिकारको क्षेत्रमा पनि संलग्न[१९] छन्।

बाल्यकाल[सम्पादन गर्ने]

निम्नमध्यम परिवारमा जन्मिएका मनोज गजुरेल आमाबाबुको सातजना छोराछोरी मध्ये कान्छा हुन्। उनका ४ जना दिदीहरू र २ जना दाइहरू छन्। ६ महिनाको हुँदा आफ्नो बाबुलाई गुमाउन पुगेका उनलाई आमाले ७ महिनाको हुँदा मामाघर ताप्लेजुङको खेवाङ्मा लगिन्। उनी ७ वर्षको हुँदा उनको परिवार झापाको दमकमा बसाइसराइ गर्‍यो। पारिवारिक कारणले उनी कहिले आमासँग, कहिले काकासँग त कहिले आफन्तसँग थुप्रै ठाउँमा बसाइँसराइ गर्नुपर्‍यो। यसरी उनको बाल्यकाल ताप्लेजुङ, पाँचथर, मोरङ, काठमाडौँमा बितेको पाइन्छ। वि.सं. २०४७ देखि काठमाडौँमा बसोबास गरेका उनी हाल बालकोट, भक्तपुरमा बसोबास गर्छन्।

शिक्षादीक्षा[सम्पादन गर्ने]

गजुरेलको प्रारम्भिक शिक्षा मावली गाउँ खेवाङ्, ताप्लेजुङको श्री गणेश मा.वि.मा शिशुकक्षाबाट सुरु भयो। उनी सात वर्षको हुँदा उनको परिवार झापाको दमकमा बसाइँसराइ गरेपछि उनको पढाइ पनि त्यतै सर्‍यो। ताप्लेजुङ, पाँचथर, झापा, मोरङकाठमाडौँका ११ वटा स्कुल पढेका उनले प्रवेशिका परीक्षाचाहिँ काठमाडौँको पद्मोदय माध्यमिक विद्यालयबाट द्वितीय श्रेणीमा उत्तीर्ण गरे। त्यसपछि आफ्नो अध्ययनलाई पत्रकारितातिर डोर्‍याएका उनले रत्न राज्यलक्ष्मी क्याम्पस, काठमाडौँबाट स्नातक तह उत्तीर्ण गरे।

पारिवारिक जीवन[सम्पादन गर्ने]

वि. सं. २०५२ सालमा वैवाहिक बन्धनमा बाँधिएका उनको वि. सं. २०५४ मा छोरा मिरोज गजुरेल र वि. सं. ०६२ मा मेमोरी गजुरेलको जन्म भयो। हाल उनी छोरा र छोरीको साथमा आमासँग बालकोट, भक्तपुरमा बसोबास गर्छन्।

साहित्यिकयात्रा[सम्पादन गर्ने]

अहिले चर्चित हास्यव्यङ्ग्यकारका रूपमा चिरपरिचित मनोज गजुरेलको साहित्यिक यात्रा पनि लोभलाग्दो नै छ। नौ कक्षा पढ्दादेखि नै युगान्तर साप्ताहिकमा 'यथार्थको धरातल' स्तम्भलेखन थालेका उनी हास्यव्यङ्ग्य लेखन, प्रदर्शन, प्रवर्द्धनमा क्रियाशील छन्। लुखास्त, हनुम्यान, मगज जोकशास्त्र हास्यव्यङ्ग्य निबन्ध प्रकाशित गरिसकेका उनी नेपाली हास्यव्यङ्ग्यको पहिलो हास्यव्यङ्ग्य अनलाइन 'डामाडोल डटकम'का सम्पादक हुन्। चट्कन, सिस्नुपानी, फित्क्यौलीलगायतका हास्यव्ङ्ग्य पत्रिकाकामा सम्पादन सहयोगीका रूपमा कार्य गरिसकेका गजुरेलले नवयुवा, मूल्याङ्कन मासिकलगायत अन्य पत्रपत्रिकामा नियमित स्तम्भलेखन गरिसकेका छन्। यस्तै रेडियो नेपालका बालकार्यक्रम, दिनप्रतिदिन जस्ता कार्यक्रममा उनका कविता, प्रहशन, नाटकहरू प्रसारण, प्रहसन भइसकेका छन्।

कलायात्रा[सम्पादन गर्ने]

सानैदेखि ठट्यौली स्वभावका गजुरेलको कलाकारितामा प्रवेश पनि सानै उमेरमा नै भयो। वि. सं. २०४० सालमा झापाको सतासीधाममा दशैँको अवसरमा प्रदर्शित नाटक खेलेर कलाक्षेत्रमा प्रवेश गरेका उनी वि. सं. २०४५ मा हिमालय माध्यमिक विद्यालय, दमक, झापाको अतिरिक्त कृयाकलापमा हास्यव्यङ्ग्य प्रस्तुति गरेर पुरस्कृत भएपछि कलाक्षेत्रमा लाग्न हौसिए। त्यसपछि गाउँघरका पूजाआजा तथा अन्य साँस्कृतिक कार्यक्रमहरूमा उनको खोजी हुन थाल्यो। वि. सं. २०४५ को अन्ततिर काठमाडौँ आएपछि रेडियो नेपालको बालकार्यक्रममा नियमित कविता वाचनमा भाग लिन थाले। उनी पढ्ने पद्मोदय मा. वि. को नजिकैका रत्न राज्यलक्ष्मी क्याम्पस, नेपाल ल क्याम्पस, विश्वभाषा क्याम्पसलगायत अन्य क्याम्पसमा दाइहरूले उनलाई मञ्च दिन थाले। उनी ती मञ्चहरूमा जम्न थाले, विद्यार्थी संगठनहरूको कार्यक्रमहरूमा उनको माग हुन थाल्यो। ती मञ्चबाट उनले आफ्नो कलाकारितालाई निखार्दै लान थाले। चालिसको दशकको अन्त्य, पचासको दशकको सुरूदेखि नै उनी स्थापित हास्यव्यङ्ग्य कलाकारको रूपमा चिनिन थाले। उनले पहिलो पारिश्रमिक वि. सं. २०५० सालमा दार्जिलिङका लागि काठमाडौँबाट निस्किएको अडियो क्यासेटमा स्वर दिएर प्राप्त गरे। 

वि. सं. २०५२ सालमा रेडियो नेपालबाट प्रसारित हुने मानवअधिकार सम्बन्धी कार्यक्रममा 'कुरा गर्‍यो कुरैको दुःख' भन्ने प्रस्तुतिबाट लोकप्रियताको शिखर चढ्न सुरूका उनले त्यही वर्ष रेडियो नेपालको १०० मेघाहर्जबाट बेलुकी प्रसारित हुने 'गुडनाइट एफएम'मा पहिलो रेडियो प्रस्तोताको अनुभव लिएका थिए। वि. सं. २०५३ सालदेखि साङ्ग्रिला च्यानलबाट प्रसारण हुने 'रमाइलो साङ्ग्रिला' कार्यक्रम चलाएर उनी टेलिभिजन कार्यक्रममा देखिन थाले।

राजनैतिकजीवन[सम्पादन गर्ने]

आफ्नो कलाकारितालाई निखार्न उनले राजनैतिक मञ्चहरूलाई भरपूर उपयोग गरे। वि. सं. २०४५ सालमा हिमालय मा. वि. मा राजनीतिक व्यङ्ग्य प्रहशन गरेपश्चात् उनी तत्कालीन प्रशासनको तारो भए। सोही वर्ष काठमाडौँ आएका उनी पद्मोदय मा. वि. मा पढ्दा वि. सं. २०४६ को आन्दोलन उत्कर्षमा पुगेको थियो। त्यहाँ उनले नेकपा माले निकट अनेरास्ववियु पाँचौको सदस्यता लिए र सोही स्कुलको प्रारम्भिक कमिटीको अध्यक्ष भए। वि. सं. २०४६ को आन्दोलनमा विद्यालयस्तरीय आन्दोलन परिचालन समितिका सदस्य भएका उनलाई चैत्र २४ आन्दोलनमा तीघ्रामा गोली लाग्यो। उनलाई मानवअधिकार संस्थाले 'जिउँदो सहिद'को सम्मान पनि दियो।

प्रजातन्त्र पुनर्स्थापना भएपश्चात् वि. सं. २०४७ सालमा जनमोर्चा नेपाल निकट अखिलको सदस्य बनेका उनी रत्न राज्यलक्ष्मी क्याम्पसको अध्यक्ष भए। वि. सं. २०५१ सालमा सोही क्याम्पसबाट स्ववियू सभापतिका उम्मेदवार बनेका उनले अनेरास्ववियु पाँचौँका उम्मेदवार राजेन्द्र राईको समर्थनमा आफ्नो उम्मेदवारी फिर्ता लिए। सोही अवसरमा उनले गरेको भाषण नै उनको अन्तिम औपचारिक राजनीतिक भाषण थियो। त्यतिबेला उनले स्ववियू सभापतिको उम्मेदवारी फिर्तामात्र गरेनन् आफूलाई औपचारिक राजनीतिक जीवनबाट पनि फिर्ता गरे।

कलाकारिता[सम्पादन गर्ने]

नेपाली हास्यव्ङ्ग्य विधामा छुट्टै पहिचान र अस्तित्व बनाएका मनोज गजुरेल वौद्धिक कलाकारका रूपमा चिनिन्छन्। उनको प्रस्तुतिमा हास्यव्यङ्ग्य र मनोरञ्जका साथै सामाजिक न्याय, राजनैतिक स्वतन्त्रता र मानवीय मूल्य मान्यताको पक्षधरता पाइन्छ। उनी सामाजिक, राजनैतिक, नैतिक, मानवीय कुरीति, कुसंस्कार, विसङ्गतिमाथि प्रहारमात्र गर्दैनन् त्यसको समाधानका उपाय साथै सकारात्मक पक्षलाई प्रोत्साहन समेत गर्दछन्। अध्ययनशील कलाकार गजुरेल कलाकारितामा आध्यात्मिक चिन्तनलाई पनि घुसाउछन्। उनले नेपाली हास्यव्यङ्ग्य कलाकारितालाई देश तथा विदेशमा समेत चिनाउन तथा स्थापित गराउन महत्वपूर्ण योगदान दिएका छन्। तत्कालीन राजा ज्ञानेन्द्र शाहको नक्कल गरेर नेपाली हास्यव्यङ्ग्य कलाकारितालाई विश्वका मिडियासम्म मात्र पुर्‍याएनन् गणतन्त्र नेपाललाई स्थापित गराउन टेवा समेत गरे। पछिल्लोपटक भारतले नेपालमाथि लगाएको नाकाबन्दीको बेला पशुपतिनाथमा नरेन्द्र मोदी बनेर गरेको 'क्षमापूजा' भारतीय सञ्चार माध्यमबाट प्रसारित भएको थियो। अमेरिकाको ह्वाइट हाउसअगाडि अन्तरराष्ट्रिय जनसमुदायका बीच उनले गरेको भारतका प्रधानमन्त्री नरेन्द्र मोदीको क्यारिकेचरलाई अन्तररास्ट्रिय सञ्चारमाध्यमले समेत प्रसारण गरेको थियो। यसले भारतलाई अझै प्रधानमन्त्री नरेन्द्र मोदीलाई नेपालमाथि लगाइएको नाकाबन्दी फिर्ता लिन दवाव सिर्जना गर्‍यो। पछिल्लोपटक अमेरिकाका राष्ट्रपति डोनाल्ड ट्रम्पको नक्कल गरिएको प्रस्तुति डेलीमेल, सिविएस लगायतका पत्रिकाले पनि प्रकाशित गरेको थियो। यसै प्रुस्तुतिलाई मध्यनजर गरेर अमेरिकी अनलाइन सीबिएस न्युजले समेत उनलाई विश्वका १८ कमेडियनको सूचीमा राखेको थियो।[२०] वि. सं. २०६५ सालमा प्रचण्डको नक्कल गरेर '२०७५ को नयाँ नेपाल' भन्ने कार्यक्रम निक्कै लोकप्रिय भएको थियो। यही कार्यक्रममा उनले नेपालमा रेल आएको र पानीजहाज चलेको प्रसङ्ग भित्र्याएका थिए। तीनदर्जन भन्दा देशमा आफ्नो प्रस्तुति दिइसकेका उनी हाल लोकप्रिय कार्यक्रम 'ढुक्क हुनुहोस्' कार्यक्रममा प्रचण्डको भूमिका गर्दैछन्। उनी नेपाली हास्यवङ्ग्यकलाकार तथा लेखकमा मात्र सीमित नभई उनी एक बहुआयामिक व्यक्तित्व हुन्। सामाजिक अभियन्ता उनी विभिन्न सामाजिक कार्यक्रमहरूमा पनि संलग्न छन्। अध्ययनशील मनोज गजुरेलको प्रस्तुतिमा अध्यात्मक चिन्तन पनि भेटिन्छ। उनी विभिन्न कार्यक्रमहरूमा उत्प्रेरक व्यक्तित्वका रूपमा पनि प्रस्तुत हुन्छन्। मनोजले पछिल्लो समय पहिलो पटक भ्रस्टाचार विरुद्द अभियानको रुपमा निर्माण भएको चलचित्र 'सयकडा दस' (Directed by : Ram sharan Pathak) मा पनि चरित्र अभिनेताको रुपमा अभिनय गरेका छन् /

मनोज गजुरेलले नक्कल गरेका प्रमुख चरित्र[सम्पादन गर्ने]

चित्र दिर्घा[सम्पादन गर्ने]

सिनेमाको यात्रा[सम्पादन गर्ने]

स्ट्यान्ड अप कमेडियनको भूमिकामा रमाइरहेका मनोज गजुरेल 'सयकडा दश' फिल्ममार्फत् नेपाली सिनेमामा पाइला टेकेका छन्। भ्रष्ट्राचारले प्रेम परिवार र समाजमा पारेको प्रभावका बारेमा बनेको चलचित्र सयकडा दश चलचित्रको उनी प्रमुख पात्र मध्ये एक हुन्। यस्तै उनी मह सञ्चारद्वारा निर्मित चलचित्र दालभात तरकारीमा पनि अतिथि भूमिका निर्वाह गरेका छन्।

संलग्नता[सम्पादन गर्ने]

  • उपाध्यक्ष – सिस्नुपानी नेपाल
  • सम्पादक – गजुरियल गार्डेन प्रा.लि.
  • सम्पादक – गजुरियल डटकम
  • इन्सेक

सन्दर्भ सामग्रीहरू[सम्पादन गर्ने]

  1. अमेरिकाको टेक्सास हल्लाउँदै मनोज गजुरेल-दैनिकनेपाल डटकम
  2. मनोज गजुरेलले सबै दर्शकलाई हँसाए, हेर्नुहोस् प्रस्तुती (भिडियो)-डिसिनेपाल डटकम
  3. मायानाथबाट मनोज गजुरेल, अन्यौलमा जन्मदिन-गफगाफ डटकम
  4. मनोज गजुरेल डोनाल्ड ट्रम्प भएर आउँदा सबै झुक्किए, सबै हासेको हासै भए, हेर्नुहोस यो बबाल कमेडी (भिडियो)-इताजाखबर डटकम
  5. सक्कली मोदी ठानेर खुट्टा ढोग्न आए:मनोज गजुरेल-लोकपत्र डटकम
  6. [ज्ञानेन्द्र, प्रचण्ड, मोदी, ट्रम्प र रामदेव अवतारपछि मनोज गजुरेलको नयाँ अवतार आउँदै-देशप्रदेश डटकम]
  7. प्रचण्ड रुपी मनोज गजुरेलसंगको कुराकानी-विविसि डटकम
  8. नक्कली मोदी बने मनाेज गजुरेल, हेर्नुहोस् ‘मोदीसँग मनका कुरा'(भिडियोसहित)-अनलाइनखबर डटकम
  9. मनोज गजुरेललाई प्रश्न : कसरी जन्मियो अमेरिकी राष्ट्रपति डोनाल्ड ट्रम्पको ‘क्यारिकेचर’?-रातोपाटी डटकम
  10. मोदी बनेपछि मनोज गजुरेल भारतमा पनि हिट (भिडियो सहित)-नेपालीहेडलाइन्स डटकम
  11. 18 Trump impersonators:Manoj Gajurel-सिविएसन्युज डटकम
  12. विश्वका उत्कृष्ट १८ कमेडियनको सुचीमा मनोज गजुरेल!-ओएसनेपाल डटकम
  13. यी हुन् नेपालका सबैभन्दा चर्चित हास्य कलाकार-नेपालीहेडलाइन डटकम
  14. प्रचण्ड किशुनजी जस्तै, देउवा रुखो, भट्टराई न हास्य न व्यङ्ग्य!-लोकान्तर डटकम
  15. राजनीति हुँदै स्टेजसम्म ‘गजुरियल’ गर्दै मनोज गजुरेल-रेडियोसोलु डटओआरजी
  16. यसरी मेरो दोस्रो न्वारान भयो-हिमालपोष्ट डटकम
  17. ग्वाङ्जाओमा 'सिस्नुपानी'को व्यङ्ग्यात्मक नयाँ वर्ष-सेतोपाटी डटकम
  18. गजुरियल डटकम
  19. मानव अधिकारलाई स्थापित गर्न कारागार भित्र हाँस्यकलाकार-इन्सेकअनलाइन डटओराजी
  20. 18 Trump impersonators:Manoj Gajurel-सिविएसन्युज डटकम

बाह्य सूत्रहरू[सम्पादन गर्ने]

यो पनि हेर्नुहोस्[सम्पादन गर्ने]